Марија Кири, која е родена на денешен ден, била првата жена професор во светот, првата жена со докторат во Франција, и првата жена која стекнала огромна слава меѓу научниците.

Како најдобар студент и првак во генерацијата завршила физика во 1893, а година подоцна добила диплома од математиката и се вработила во училиште за физика и хемија, каде работел младиот докторант Пјер Кири. Марија и Пјер се венчале, а по негова препорака таа почнала сама да работи на докторатот. Почнала да ги истражува активностите на соединување на ураниумот, утврдувајќи дека и некои материи имаат слични својства и тоа го нарекла радиоактивност. По четири години истражување, Марија и Пјер Кири во 1903 година добиле Нобелова награда за физика, а истата година таа докторира на Сорбона и станала првата жена – доктор на науки во Франција.

Во текот на напредувањето во научниот свет, Марија родлила две ќерки, Ирена и Ева. И покрај големата посветеност на работата, будно го следела развојот на своите деца бележејќи ги во дневник нивните достигнувања, на Ирена во математиката, а на Ева во музиката.

Го презела местото на покојниот сопруг на Сорбона 

Смртта на Пјер Кири, во сообраќајна незгода, ја шокирала Марија и таа целото свое време ѝ го посветила на научната работа. Од 1906 го презела местото на покојниот сопруг на Сорбона и така станала првата жена-професор во историјата на овој универзитет. Во 1910 ја објавила фундаменталната расправа за радиоактивноста, а под нејзино влијание голем број научници почнале да ги проучуваат радиоактивните супстанции.

Трудот повторно ѝ бил награден со Нобелова награда во 1911 година, овој пат за хемија. По наградата Марија успеала да ја убеди француската влада да овозможи отворање институт за радиум, денешен Институт Кири.

Првата светска војна Марија Кири ја поминала  како шеф на воената медицинска служба, организирајќи подвижни рендгенски комори за преглед на војниците. По војната, им се посветила на истражувањата, во што ѝ се приклучила и ќерка ѝ Ирена.

Слабата здравствена состојба секако имала врска со радиоактивноста што ја проучувала и која ја довела до леукемија. Починала на 4 јули 1934, била погребена покрај Пјер Кири.

Франција ѝ оддала почест во 1995 година, кога нејзините и посмртните останки од Пјер се преместени во париски Пантеон.