Вирџинија Џуфре, која ги обвини американскиот финансиер и сексуален престапник Џефри Епштајн и британскиот принц Ендру за сексуален напад, изврши самоубиство на 41-годишна возраст, соопшти нејзиното семејство.

Полицијата на Западна Австралија потврди дека службите за итната помош го пронашле безживотно тело во нејзиниот дом во близина на Перт синоќа, објави „Си-ен-ен“.

И покрај обидите за реанимација, смртта била констатирана на местото на настанот. Полицијата соопшти дека нејзината смрт не се третира како сомнителна.

„Со скршено срце ја информираме јавноста дека Вирџинија почина синоќа во својот дом во Западна Австралија. Таа си го одзеде животот, откако беше доживотна жртва на сексуална злоупотреба и трговија со луѓе“, се вели во соопштението.

Џуфре, мајка на три деца, стана позната во јавноста во 2019 година кога изјави дека Епштајн ја принудил на сексуални односи со негови познаници, вклучувајќи го и принцот Ендру, кога имала 17 години.

Таа исто така тврдеше дека принцот знаел дека таа е малолетна во тоа време. Принцот Ендру постојано ги негираше нејзините обвинувања.

„Вирџинија беше бестрашен борец против сексуалната злоупотреба и трговијата со луѓе. Таа беше светлина што им пружи поддршка на бројни преживеани. На крајот на краиштата, товарот на злоупотребата беше претежок за да може да го носи понатаму“, се вели во соопштението на семејството.

Која беше Вирџинија Џуфре?

Таа е родена како Вирџинија Робертс во 1983 година во Калифорнија. Нејзиното семејство подоцна се преселило на Флорида. На седумгодишна возраст, како што откри, била сексуално злоупотребувана од семеен пријател и брзо ѝ било одземено безгрижното детство.

„Бев толку ментално исплашена на толку рана возраст што морав да побегнам од тоа“, изјави таа за „BBC Panorama“ 2019.

Детството го поминала во згрижувачки семејства, а до својата 14 година живеела на улица каде, како што вели, не пронашла ништо „освен глад, болка и уште злоупотребување“. Во 2000 година, додека се обидувала да си го среди животот, се запознала со Гислејн Максвел која била член на елитата, миленичка на високото општество во Лондон и Њујорк и поранешна љубовница и блиска соработничка на озлогласениот Џефри Епштајн.

Додека Џуфре работела во одморалиштето на Доналд Трамп во Палм Бич, Максвел ѝ понудила можност да се обучи и работи како терапевтка за масажа. Кога Џуфре пристигнала во домот на Епштајн во Палм Бич, таа тврди дека тој лежел гол и дека Максвел ѝ дала инструкции како да го масира.

„Поставуваа прашања за тоа која сум јас. Изгледаа како драги луѓе, им верував и им кажав дека дотогаш имав многу тежок период во мојот живот, дека побегнав од дома, дека бев сексуално и физички малтретирана. Тоа беше најлошото нешто што можев да им го кажам бидејќи сега знаеја колку сум кревка“, изјави Џуфре за „Би-би-си“ која очекувала дека ќе има интервју за работа, но тоа набрзо се претворило во почетокот на нејзиниот „нов пекол“.

Гислејн Максвел беше прогласена за виновна за пет од шест точки во декември, вклучително и најсериозното обвинение, онаа за сексуална трговија со малолетници.

Иако Џуфре беше споменувана во многу наврати на суд, таа не беше една од четирите жени кои сведочеа против Максвел. Во 2015 година, Џуфре поднесе тужба за клевета против Максвел откако обвинувајќи ја дека лаже. Тогаш случајот беше решен.

Била „како послужавник со овошје“

Епштајн ја „раздавал“ на неговите моќни соработници додека ја шетале со приватни авиони низ светот. Кога имала 17 години, таа тврди дека Епштајн ја донел во Лондон и ја запознал со принцот Ендру. Сега веќе познатата фотографија за која вели дека е направена таа ноќ го прикажува принцот со раката околу нејзината половина, додека Максвел се насмевнува во позадина.

„Тоа беше ужасен период од мојот живот. Не бев врзана за мијалник, но овие моќни луѓе беа како мои синџири“, изјави таа за „Би-би-си“.

Во својата тужба, Џуфре тврди дека принцот Ендру сексуално ја злоупотребувал три пати – во куќата на Максвел во Лондон таа вечер, а подоцна и во куќите на Епштајн во Менхетен и Сент Џејмс на Девствените Острови.

Принцот Ендру во интервју во 2019 година рече дека не се сеќава дека некогаш се сретнал со Џуфре и како одговор на нејзината изјава дека имале секс во САД и Велика Британија, истакна дека „тоа не се случило“.

До 2003 година, Епштајн го изгубил интересот за неа бидејќи таа била премногу „стара“ за него. Џуфре успеала го убедила богатиот финансиер да плати за нејзината обука за да стане вистинска професионална масерка и ѝ помогнал да оди на курс во Тајланд.

На тоа патување го запознала човекот во кој се заљубила и 10 дена подоцна се омажила за него. Со него се преселила во Австралија и основала семејство.