Бремена жена во американската држава Џорџија, која беше прогласена мозочно мртва по итна медицинска интервенција, е на апарати за одржување во живот три месеци за да може фетусот да се развива до породувањето. Според нејзиното семејство, болницата им рекла дека тоа е задолжително според строгиот закон против абортус. Со повеќе од три месеци до терминот, ова би можела да биде една од најдолгите бремености од ваков вид. Семејството е огорчено, бидејќи законот што забранува абортус по откривање на срцева активност на фетусот не му дозволува на семејството да одлучи дали бремената жена ќе остане на апарати. Таканаречениот „Закон за отчукувања на срцето“ во Џорџија е еден од најстрогите закони против абортус, усвоен во конзервативните американски држави откако Врховниот суд на САД ја поништи пресудата „Роу против Вејд“ пред три години, со која се гарантираше правото на легален абортус.

Адријана Смит, 30-годишна медицинска сестра и мајка, беше прогласена за мозочна мртва во февруари, што значи дека е законски мртва, изјави нејзината мајка, Ејприл Њукирк. Според неа, Адријана имала силни главоболки за кои побарала помош во Атланта, каде што ѝ биле дадени лекови и била пуштена дома. Следното утро, таа едвај можеше да дише. Во Универзитетската болница Емори, кај неа биле пронајдени згрутчувања на крвта, по што била прогласена мозочна смрт.

Њукирк рече дека Смит сега е бремена 21 недела. Исклучувањето од апаратите за дишење и другите уреди веројатно би значело смрт на фетусот. Семејството изјавило дека лекарите во болницата им рекле дека според законот на Џорџија не можат да ги исклучат апаратите бидејќи е откриена срцева активност на фетусот, што законот го признава како граница по која абортусот е забранет.

Законот беше донесен во 2019 година, но не беше спроведен сè до 2022 година, кога пресудата во случајот Добс против Џексон за Организацијата за здравје на жените го отвори патот за забрана на абортус. Моментално, дванаесет држави го забрануваат абортусот целосно, додека уште три, вклучувајќи ја и Џорџија, го забрануваат по шест недели од бременоста.

Законот на Џорџија предвидува исклучоци ако абортусот е неопходен за да се зачува животот на жената, но правните експерти велат дека тоа не е јасно дефинирано. Семејството Смит, вклучувајќи го и нејзиниот петгодишен син, продолжуваат да ја посетуваат во болницата, соочувајќи се со неизвесноста и емоционалниот товар. Според лекарите, фетусот има течност во мозокот, што може да укажува на сериозни здравствени проблеми.

„Тоа е моето внуче, но можеби нема да може да гледа, да оди, па дури ни да преживее по раѓањето“, рече Њукирк. Таа не сакаше да открие дали семејството сакало Смит да се симне од машината.

Моника Симпсон, извршна директорка на „СистерСонг“, која ја тужеше државата поради законот за абортус, изјави: „Нејзиното семејство заслужува право да донесува одлуки за нејзината медицинска нега. Наместо тоа, тие минуваат низ повеќе од 90 дена траума, огромни медицински трошоци и неможност да најдат мир“. Тадеус Поуп, биоетичар и адвокат на Правниот факултет „Мичел Хамлајн“ во Минесота, рече дека неколку држави имаат закони што го ограничуваат прекинувањето на третманот за бремена жена со мозочна смрт, но Џорџија не е една од нив.

„Прекинувањето на механичката вентилација нема да се смета за абортус. Продолжувањето на третманот не е законски задолжително“, рече Поуп.

Лоис Шепард, биоетичарка и професорка по право на Универзитетот во Вирџинија, се согласи и додаде дека не верува оти континуираната поддршка во живот во овој случај е законски потребна. Мозочната смрт за време на бременоста е исклучително ретка. Во медицинската литература има само 35 евидентирани случаи каде што лекарите се обиделе да ја продолжат бременоста кај жени со мозочна смрт. Од тие бремености, 27 резултирале со живородени деца, но во повеќето случаи бременоста траела само околу седум недели.

Д-р Винченцо Бергела, директор на мајчино-феталната медицина на Универзитетот Томас Џеферсон, вели дека случајот во Џорџија е многу покомплициран бидејќи жената била бремена само девет недели кога била прогласена за мозочна смрт.

Законот на Џорџија го признава фетусот како правно лице, а републиканскиот сенатор Ед Сецлер ја поддржува позицијата на болницата:

„Мислам дека болницата го прави правилното. Ова е невообичаена ситуација, но ја покажува вредноста на невиниот човечки живот“, рече Сецлер. Тој додаде дека семејството Смит има можност да го задржи детето или да го даде на посвојување.