Во Загреб била донесена пресуда во корист на жена која го тужела градот откако паднала на Цветни плоштад.

„Одев по плоштадот ‘Петар Прерадовиќ’ кон улицата ‘Преображенска’ кога го закачив врвот од чевлата на оштетена бетонска плоча на тротоарот, која штрчеше над нивото на тротоарот, паднав и сериозно се повредив. Штетата не беше добро видлива поради темнината и дождот, а кога се вратив дома се јавив кај мојот лекар“, рече М. Т., жителка на центарот на Загреб, која конечно ја доби тужбата против Градот.

Немилиот настан датира од мај 2022 година, а М.Т. одлучила да го тужи Градот во април 2023 година. На суд, таа побарала 3.750 евра за неимотна штета, што вклучува физичка болка, страв и ментална болка поради намалена животна активност, како и уште 600 евра за помош и грижа од други луѓе во времето кога била повредена, пишува „Јутарњи лист“.

Жената при падот претрпела фрактура на десниот хумерус, што обично се случува кога некој ќе падне на испружени раце или рамо, што укажува дека жената паднала точно како што опишала на суд.

Судот утврди дека Градот е единствено одговорен за штетата бидејќи не го одржувал тротоарот. Тој пресуди дека треба да ѝ плати на жената точно она што го побарала, 3.750 евра. Дополнително, Градот треба да ги плати трошоците за судската постапка во износ од 2.783,64 евра со затезна камата. Пресудата не е конечна и двете страни можат да поднесат жалба против неа.