Синтија Ериво ова лето ќе го игра Исус Христос во мјузиклот „Исус Христос суперѕвезда“ („Jesus Christ Superstar“) од Ендрју Лојд Вебер и Тим Рајс, која ќе се одржи во Холивуд Бол. Актерката ја сподели веста на својот инстаграм-профил со коментар: „Ова лето ќе бидам малку зафатена, едвај чекам“, пренесе „Варајети“.

Ова не е првпат Ериво да биде дел од овој мјузикл – во 2020 година ја играше улогата на Марија Магдалена во специјална, целосно женска верзија на претставата, каде што ја изведе и познатата песна „I Don’t Know How to Love Him“.

Претставите во Холивуд Бол, амфитеатар во Лос Анџелес, ќе се одржуваат од 1 до 3 август, а остатокот од актерската екипа ќе биде објавен дополнително.

Режијата и кореографијата се доверени на добитникот на наградата Тони, Серхио Трухиљо, додека музички директор и диригент ќе биде Стивен Оремус, исто така добитник на Тони.

Мјузиклот „Исус Христос суперѕвезда“ првично бил издаден како концептуален албум, пред да ја доживее својата премиера на Бродвеј во 1971 година. Приказната го следи последниот период од животот на Исус, а филмската адаптација, режирана од Норман Џуисон, беше објавена во 1973 година. Во 2018 година, Ен-би-си го емитуваше „Исус Христос суперѕвезда: концерт во живо за Велигден“, со Џон Леџенд како Исус и Сара Барејлис во улогата на Марија Магдалена.

Ериво ја презема улогата на Исус во момент кога нејзината кариера е во подем. Таа е номинирана за Оскар за најдобра актерка за улогата на Елфаба во филмската адаптација на „Злобница“ („Wicked“) во режија на Џон М. Чу.

„Се надевам дека ова ќе биде љубовно писмо до сите што се чувствуваат поинакви, како да не припаѓаат некаде – особено до сите црни жени кои влегле во простории и почувствувале дека не се добредојдени“, изјави Ериво за својата улога во „Злобница“.

Таа ќе ја повтори улогата на Елфаба во филмот „Злобница: за добро“ („Wicked: For Good“), чија премиера е закажана за ноември во продукција на „Јуниверсал пикрчс“.