Нафтали Бенет само неколку часови подоцна му одговори на премиерот, барајќи од него „де не остава пепел зад себе“ и „да го прифати фактот дека граѓаните имаат право да формираат влада дури и ако Нетанјаху не е на нејзиното чело“

Службата за домашна безбедност Шин Бет завчера со ретка реакција во јавноста се обиде да ја смири ситуацијата и ги повика сите политичари, служби за безбедност, верски лидери, наставници и сите граѓани „да преземат одговорност за она што го кажуваат“

Поранешни функционери задолжени за безбедност побараа да биде забранет планираниот марш на десничари во Ерусалим, за да не предизвика нов бран израелско-палестински судири, сличен на оној пред еден месец поради кој Хамас стрелаше ракети врз Израел, а израелски авиони ја бомбардираа Газа

Израелскиот премиер Бенјамин Нетанјаху ја опиша како „најголема измама во историјата“ коалицијата од неговите политички противници што ќе ја формираат идната влада, со што индиректно ги засилува притисоците и заканите кон десничарите што му го свртеа грбот.

Ситуацијата во Израел потсетува на онаа пред промената на власта во јануари во САД, кога поранешниот претседател Доналд Трамп не го признаваше изборниот пораз и ги повикуваше своите симпатизери да ѝ се спротивстават на измамата. Изјавите на Нетанјаху, иако не содржат директен „повик за одбрана“, поттикнаа закани против членови на идната коалиција, а ситуацијата уште повеќе може да ескалира в четврток, за кога е најавен голем марш на националисти во Ерусалим.

За кабинетот на чело со центристот Јаир Лапид и екстремниот десничар Нафтали Бенет Кнесетот ќе треба да се произнесе најверојатно на 14 јуни.

– Сведоци сме на најголемата изборна измама во историјата во земјата, а според моето мислење и во историјата на демократијата воопшто – изјави Нетанјаху, обраќајќи им се на пратениците од неговата десничарска партија Ликуд.

Се уште актуелниот премиер за „измама“ ја смета одлуката на Бенет да го прекрши ветувањето од предизборната кампања дека нема да прави сојузи со партиите на левичарите, центристите и на израелските Арапи, а сите овие политички групи се собрани во коалицијата на Лапид и Бенет, со цел да се обезбеди мнозинство гласови во парламентот.

– Моите пријатели во Ликуд и јас лично, со сите сили се спротивставуваме на формирањето на оваа опасна влада на измама и предавство. А, ако, не дај Боже, таа биде формирана, ние многу брзо ќе ја собориме – порача Нетанјаху.

Бенет само неколку часови подоцна му одговори на премиерот, барајќи од него „де не остава пепел зад себе“ и „да го прифати фактот дека граѓаните имаат право да формираат влада дури и ако Нетанјаху не е на нејзиното чело“. Бенет, исто така, го предупреди спикерот на Кнесетот, Јарив Левин, кој важи за лојалист на Нетанјаху, „да не се обидува да охрабрува пратеници од новата владејачка коалиција да гласаат против неа“.

– Оставете ја оваа земја да чекори напред. Господине Нетанјаху, не оставајте пепел зад себе. Сите ние, целата нација, би сакале да ве паметат по добрите работи што сте ги направиле за време на вашата 12-годишна служба – изјави Бенет.

                                       Шин Бет бара сите да бидат одговорни

Службата за домашна безбедност Шин Бет завчера со ретка реакција во јавноста се обиде да ја смири ситуацијата и ги повика сите политичари, служби за безбедност, верски лидери, наставници и сите граѓани „да преземат одговорност за она што го кажуваат“.

Шефот на Шин Бет, Надав Аргаман изјави дека екстремистичките изјави „може да ја разгорат ситуацијата и да доведат некој да биде и физички повреден“. Иако Аргаман не посочи ниту едно име, израелските медиуми сметаат дека повикот за смирување на ситуацијата се однесува на заканите против Бенет и другите членови на неговата партија Јамина, поттикнати од обвинувањата од Нетанјаху дека се „предавници“.

Од четвртокот Шин Бет организираше физичка заштита на Бенет, кој ќе биде премиер на Израел во следните две години, ако Кнесетот ја усвои новата влада. Ова е преседан во Израел, зашто службата за безбедност вообичаено физички заштитува само три лица – премиерот, претседателот и лидерот на опозицијата.

– Израел е изграден врз принципот на слободата на изразување. Таа е важна и неопходна во сите демократски нации. Но, од неодамна забележавме загрижувачко зголемување и интензивирање на поттикнување насилства, особено на социјалните медиуми, вклучувајќи закани, говор на омраза, па дури и повици за физички напади. Како шеф на организацијата чија задача е да ја штити безбедноста на нацијата, на демократскиот режим и на институциите, предупредувам дека овој дискурс може да биде интерпретиран од одредени групи и самостојни „стрелци“ како повик за предизвикување физички повреди – изјави Аргаман.

Освен официјалниот повик до јавноста, шефот на Шин Бет неофицијално веќе ѝ испратил информации на полицијата за идентитети на лица за кои има сомневања дека поттикнуваат политичко насилство.

И министерот за одбрана Бени Ганц ги повика „сите во Израел да се воздржат од каква било форма на насилство“. Ганц притоа истакна дека „јавните лидери имаат специјална одговорност“ и дека „Израел не ја научил лекцијата од минатите случаи“, алудирајќи на атентатот врз премиерот Јицак Рабин во ноември 1995 година.

Тамар Зандберг, пратеник од либералната партија Мерец, смета дека предупредувањата од Шин Бет и од министерот за одбрана индиректно се насочени против најблиските соработници на Нетанјаху „итно да ја исклучат машината за сеење омраза“.

                                Рабините бараат да се спречи новата влада

Притисок врз јавноста извршија и водечките израелски рабини, кои ги повикаа посветените верници да го спречат формирањето на коалициската влада за промени.

– Не може да се прифати реалност во која ќе се формира израелска влада што ќе им наштети на најосновните прашања на религијата и државата што се прифатени од основањето на Израел и од сите досегашни влади. Несомнено е дека оваа влада ќе ја наруши безбедноста на нашето постоење, бидејќи се потпира на поддржувачи на теророт и вклучува министри што апелираат до Меѓународниот кривичен суд во Хаг да спроведе истрага за воени злосторства наводно извршени од офицери на израелските сили за безбедност – наведуваат рабините, алудирајќи на партијата Рам на израелските Арапи и на левичарскиот лидер Никан Хоровиц.

Покрај тоа, се проценува дека новата влада е „целосно против волјата на народот“ и дека „сè мора да се проба и да се направи за таа да не биде формирана“. Еден од потписниците на писмото, рабинот Хаим Друкман, подоцна негираше дека повикот на рабините може да се толкува како поттикнување на насилство и тврди дека тој се спротивставува на сите форми на насилство и дека формирањето на владата треба да се спречи со демократски средства.

                                     Експлозивен марш во Ерусалим

Поранешни функционери задолжени за безбедност побараа да биде забранет планираниот марш на десничари во Ерусалим за да не предизвика нов бран израелско-палестински судири, сличен на оној пред еден месец поради кој Хамас стрелаше ракети врз Израел, а израелски авиони ја бомбардираа Газа.

Контроверзниот Марш на знамето беше прекинат на 10 мај, на Денот на Ерусалим, кога Хамас ги истрела првите ракети кон Израел, а е презакажан за задутре. Министерот за одбрана Бени Ганц изјави дека „ќе побара маршот да биде откажан“, но премиерот Нетанјаху сѐ уште јавно не се изјаснил за десничарскиот собир.

– Маршот не смее да биде дозволен, поради реална закана за јавната безбедност. Не поради предупредувањата од Хамас да не се одржува, туку бидејќи е сосема јасно дека ова е обид да се потпали Источен Ерусалим – изјави за локалната телевизија „Канал 12“ поранешниот командир на ерусалимската полиција Ариех Амит.

Поранешниот шеф на полицијата Моше Каради оцени дека маршот не мора целосно да биде забранет, но мора да се промени маршрутата, за да се избегнат чувствителните точки како Дамасковата порта во Стариот град.

– Источен Ерусалим сега е полн со бензин и едно мало чкорче е доволно за да пламне – предупреди Каради.