Едно од најпрепознатливите логоа на интернетот, сината птица на Твитер, повеќе не постои. Дали црно-белиот X што ќе го замени ќе се покаже како маестрален удар или катастрофа за брендирање, останува да се види во наредниот период.

Професорот од Бизнис школата на Универзитетот во Чикаго, Жан-Пјер Дјуб најпрво мислел дека милијардерот Илон Маск се шегувал кога објавил дека го менува логото на Твитер.

„Зошто да земете признат бренд, со многу голем капитал околу него, а потоа целосно да го фрлите и да започнете од нула?“ прашува професорот Дјуб.

Како сето ова би функционирало на долг рок?

Преземањето на Твитер од страна на Маск минатата година претставува голем удар за социјалната мрежа.

Маск претходно објави дека приходите од рекламите се намалени за половина, откако големите брендови се повлекоа, претпазливи за промените што тој ги направи, вклучително и како фирмата се справува со претплатените корисници и начинот на кој ја ублажува содржината. Наглите отпуштања и неплатени сметки, исто така, доведоа до лош имиџ на фирмата и неколку тужби.

Проценките на „Фиделити“, која има удел во компанијата, сугерираат дека таа сега вреди само една третина од сумата која Маск ја плати за Твитер во октомври, пишува „Би-Би-Си“.

Истражувањата сугерираат дека ребрендирањето може да се исплати – особено ако фирмата е во неволја или сака да го промени правецот, вели Јанхуи Жао, професор по маркетинг на Универзитетот во Небраска Омаха.

Неговиот преглед на 215 огласи за ребрендирање од јавно котирани компании покажа дека повеќе од половина од тие бизниси забележале позитивни приноси откако се ребрендирале.

Тоа значи дека потезите на Маск би можеле да бидат навремени, рече тој, истакнувајќи ја амбицијата на мултимилијардерот да го трансформира Твитер во „апликација за сè“ слична на кинеската ВиЧет, апликација за пораки на која корисниците можат да испраќаат пари, да најдат такси, да резервираат хотели и да играат игри, меѓу другите функции.

Сината птица се претвори во „Х“