Земјоделци од шест здруженија во Србија започнаа протест во Нови Сад напладне поради неисполнетите претходни барања за гориво, кредити, берза и долгови кон Фондот за пензиско и инвалидско осигурување, пренесува РСЕ.

Тие донесоа десетици трактори пред комплексот згради на Покраинската влада и Собранието на Војводина, објави агенцијата Бета.

Иако беше најавено дека нема да има блокада на сообраќајот, тоа сепак се случи, бидејќи неколку десетици трактори беа паркирани пред зградата на Владата на Војводина.

Претставничката на Иницијативата за спас на српските земјоделци, Милета Сланкаменац, им изјави на новинарите дека ова е предупредувачки протест и дека ќе ги координираат понатамошните активности со други здруженија.

„Ќе бидеме паркирани тука, се надевавме дека нема да има блокада. Да нè пуштеа на паркингот, ќе беше зафатена само една лента. Не знам кој работи тука (во зградата на Бановина) па мора да ја оградат“, рече Сланкаменац.

Се очекува блокадата, според агенцијата Бета, да трае во следните неколку часа.

Протестот на земјоделците го поддржаа и студентите во блокадата со слоганот „Тракторот доаѓа, мој никаквец“, објави порталот 021.rs.

Одлуката за протест беше донесена во четврток на заеднички состанок на здруженијата Иницијатива за спас на земјоделците, Доловачки паори, Банатска црница, Сојузот на здруженија на земјоделци од Банат, Здружението на земјоделци од Арадац и Здружението на земјоделци од Србобран.