Украинскиот претседател Володимир Зеленски во четврток ќе престојува во Париз, каде ќе се сретне со претседателката на Европската комисија Урсула фон дер Лајен, генералниот секретар на НАТО Марк Руте и лидерите на Германија, Франција и Обединетото Кралство, на поширок собир на сојузниците на Украина.

Во фокусот на разговорите, како што јавуваат француските медиуми, ќе бидат безбедносните гаранции за Украина, тема која во последните недели доминира во дипломатските напори на Западот за ставање крај на руската инвазија.

Средбата ќе ја ко-претседаваат францускиот претседател Емануел Макрон и британскиот премиер Кир Стармер, заедно со германскиот канцелар Фридрих Мерц, кој ќе учествува од далечина.

Киев бара силни европски гаранции и можност за создавање мировни сили, предупредувајќи дека Русија би можела да се обиде со нова инвазија дури и по евентуален мировен договор.

Москва, пак, ги отфрла овие иницијативи и тврди дека проширувањето на НАТО кон нејзините граници е една од главните причини за конфликтот.