Украинскиот претседател Володимир Зеленски денес ги предупреди европските лидери дека Русија сè уште „мисли дека е доволно смела да ја ескалира војната“ преку инциденти со беспилотни летала низ Европа.

 

„Сите сме во нова реалност сега и, мислам, сите го разбираат тоа, дури и оние кои можеби не сакаат да го признаат тоа“, рече Зеленски во својот воведен говор на отворањето на Самитот на Европската политичка заедница (ЕПЗ) во Копенхаген.

Тој додаде дека најновите напади со беспилотни летала се обид на Русија да ја подели Европа и да спречи заеднички одговор.

Украинскиот лидер предупреди дека слични инциденти може да се случат насекаде во Европа, вклучително и западниот и јужниот дел од континентот, нагласувајќи ја потребата од брз и ефикасен одговор.

Зеленски ги повика европските лидери да го забрзаат усвојувањето на 19-тиот пакет санкции против Русија и да го поддржат прекинот на купувањето руска нафта во Европа.

Тој, исто така, ја критикуваше Унгарија, нагласувајќи дека нејзините лидери исто така мора да реагираат и оцени дека енергијата од САД и другите партнери може да ги замени руските испораки.

Претседателот на Украина, исто така, ѝ честиташе на Молдавија за успехот и победата на парламентарните избори и ги повика лидерите формално да го отворат првото поглавје од преговорите за пристапување на Молдавија и Украина во Европската Унија.