Украинците се во „смртна опасност“ ако западните земји не продолжат со финансиска поддршка, предупреди првата дама на Украина, Олена Зеленска, во интервју за Би-Би-Си, откако републиканските сенатори во САД го блокираа клучниот предлог-закон за помош, со кој за Украина треба да се обезбедат околу 60 милијарди долари помош.

Американскиот претседателот Џо Бајден соопшти дека неуспехот да се договори помош на Украина ќе биде „подарок“ за претседателот Владимир Путин, предупредувајќи дека историјата „строго ќе им суди на оние кои го свртеа грбот на каузата на слободата“.

Во ексклузивното интервју, Олена Зеленска вели дека на нејзината земја и е неопходна помош.

Навистина ни треба помош. Едноставно кажано, не можеме да се замориме од оваа ситуација, бидејќи ако го направиме тоа, ќе умреме. А ако светот се измори, тие едноставно ќе не остават да умреме…Многу нè боли кога гледаме знаци дека страсната подготвеност да се помогне може да исчезнува. Тоа е витално прашање за нас – рече Зеленска.

И Велика Британија ги повика политичарите во Вашингтон да се договорат за Украина. Британскиот министер за надворешни работи Дејвид Камерон за време на неговата посета на Вашингтон ги повика САД да не му даваат на Путин „божиќен подарок“ со блокирање на милијарди долари финансиска поддршка потребни за продолжување на војната против руските сили.

Нема сомневање дека односот на меѓународната заедница кон Украина е променет, пишува Би-Би-Си. Целосната поддршка во Вашингтон не може да се гарантира, а сепак основите на конфликтот не се поместени.