Здружението за поддршка на луѓето што живеат со ХИВ – ЗАЕДНО ПОСИЛНИ Скопје, како претставник на засегната група граѓани, односно луѓето што живеат со ХИВ и нивните блиски, реагира на статијата објавена на „Слободен печат“ насловен „Расте бројот на заразени со ХИВ/СИДА – за 8 месеци годинава 34 новозаразени, 25 други „закачиле“ сифилис” и укажува дека објавената бројка од извештајот на Институтот за јавно здравје се однесува и на лица кои годинава се дијагностицирале, а од вирусот се инфицирале во некој претходен период.

-Статијата пренесува информација од Институт за јавно здравје кој известува дека во текот на 2023 има 34 „новозаразени“ лица со ХИВ. Потенцираме дека изворната информација објавена од Институтот за јавно здравје наведува исклучиво број на ПРИЈАВЕНИ, а не број на новоинфицирани лица. Ова значи дека во текот на 2023 г. дијагностицирани биле 34 лица, за кои стигнале пријави до Институтот, но не и дека лицата биле инфицирани („заразени“) во текот на годината, стои во реакцијата на Здружението.

Оттаму потенцираат дека термините „закачиле“ и „заразени“, како и издвојувањето на поединечни градови во кои се регистрирани по еден или неколку случаи, кога станува збор за сексуално преносливи инфекции не само што не е од помош, туку и ги стигматизира луѓето засегнати од овие инфекции и дополнително ги табуизира споменатите заболувања, а со тоа се намалуваат шансите луѓето што можеби биле во ризик да побараат соодветна здравствена грижа, односно тестирање и лекување, што е единствениот начин овие инфекции да се елиминираат.

Здружението додава дека зголемен број на дијагностицирани случаи не само што не укажува нужно на зголемено пренесување на вирусот, туку всушност е најпожелното сценарио за земјата.

-Имено, ставањето крај на епидемијата на ХИВ до 2030 година, коешто е глобална цел и обврска и на Република Северна Македонија, може да се постигне само доколку значително го зголемиме бројот на нови дијагнози во годината, па наместо околу 45, колку што изнесуваше во просек во текот на изминатите 5 години, тој да изнесува 70 или 80 нови дијагнози годишно. Само на тој начин во текот на наредните неколку години би можеле да бидат дијагностицирани најголемиот дел од лицата со ХИВ коишто не се свесни за својата инфекција. Со дијагностицирањето на ХИВ, луѓето можат веднаш да започнат со антиретровирусна терапија, која го потиснува вирусот и го оневозможува неговото натамошно пренесување. Така, зголеменото дијагностицирање на ХИВ ќе доведе до драстично опаѓање на бројот на новонастанати инфекции и до конечно ставање крај на оваа епидемија, нагласуваат од Здружението од Скопје и укажуваат дека во контекст на превенцијата од ХИВ/СИДА потребно е луѓето да се охрабрат да се тестираат и лекуваат.

Согласно постоечката евиденција на пријавени случаи (заклучно со 31.08.2023), кумулативниот број на лица регистрирани со ХИВ/СИДА во Р. Северна Македонија, за периодот 1987–2023, изнесува 620, од кои 123 лица починале, а 497 лица живеат со ХИВ/СИДА, на наведува во последниот извештај на ИЈЗ.