Овој период од годината е најбогат со дарови од природата што мора да се често присутни во менито, затоа што на тој начин му обезбедувате на организмот здрава храна, која го снабдува со корисни материи.

Бенефитот од консумација зеленчук е најголем ако го јадете во свежа состојба како салати или, пак, лесно обработен, без долга термичка подготовка. Сега кога го има во изобилие, вистинска штета е да го изоставите и да се храните со тешка храна.

Праз

Овој зеленчук што успешно се одгледува кај нас, има убав вкус и се комбинира со свежите пролетни салати. Исклучително е богат со витамини Ц, Б1, Б2, како и минерали магнезиум, калиум и фосфор. Исто така стеблото му е богато со каротен, кој е природен антиоксидант. Со него можете да направите салати, но и да го додадете во пити, чорби и други јадења.

Блитва

Блитвата во последните години сè почесто се користи кај нас. Таа има темнозелени листови и бело стебленце, а е богата со витамин Ц и К, кои се неопходни за засирување на крвта. Во неа има и многу калциум, кој е добар за коските, железо, кое го одржува нормално нивото на хемоглобин во крвта. За разлика од цвеклото, овој зеленчук го има порано, уште од април. Вкусот е сличен
на спанаќ, па може да биде додаток во салати, да се бланшира, да се подготви како чорба или пролетна супа. А проја со блитва е нешто неверојатно вкусно.

Рукола

Овој листест зеленчук има малку горчлив, но пријатен вкус и е најдобар во свежа салата. Може да ја најдете во текот на целата година, не само напролет. Освен во салата, руколата е совршена за подготовка на песто, или како гарнир со риба.

Аспарагус

И овој зеленчук е достапен во текот на целата година, но најдобро е да се јаде напролет. Богат е со витамини од групата Б, содржи и фолна киселина, витамини Ц и К, како и многу микроелементи. Единствен недостаток му е високата цена. Можете да го подготвите на разни начини – во салати, пире, омлет, паста и како прилог со други јадења. Најважно е дека не треба да се обработува долго.
Доволно е да биде бланширан во врела вода или кратко потпечен на скара или во грил тава со малку путер.

Спанаќ

Иако сме навикнати да го готвиме на традиционален начин, во тава, со малку ориз, некој става и цели јајца одозгора, па потоа потпечен во рерна, сепак може да се јаде и свеж во салата. Богат е со витамини А, Е, Ц, К, каротин, железо и други микроелементи. Ако листовите се млади, тогаш можете кратко да ги пропржите на малку путер или масло и да ги додадете во некоја салата.

И за крај, салатите збогатете ги со изртени семиња од пченица, ’рж, јачмен, овес и сл. Не само што ѝ додаваат на храната корисни состојки, туку вкусот го прават неверојатен.