Третото поетско дело на Васко Марковски во издание на „Бегемот“ е хаику дневникот „Микроскоп, телескоп, стетоскоп“. Книгата е објавена во едицијата „Наше маало“, дизајнот на корицата е на Наталија Лукомска, а хаику творештвото на Марковски ревносно го следи рецензентот и професор Владимир Мартиновски.

– Во последниве две децении канонизираниот лирски вид хаику доживува силен интерес меѓу македонските писатели, а меѓу нив особено се истакнува токму Васко Марковски. Неговата книга „Корпоративно утро“ (2013, 2023) несомнено се вбројува меѓу најдобрите збирки хаику поезија напишани на македонски јазик, а неговиот најнов ракопис, именуван „Телескоп, микроскоп, стетоскоп (хаику дневник)“, е еден вид круна не само на неговиот интерес кон лапидарното поетско изразување, туку во него се вкрстуваат неколку клучни афинитети на авторот по кои тој е препознатлив во книжевната и културната јавност: репортажата, кусата проза, фотографијата и музиката.

Збирката „Микроскоп, телескоп, стетоскоп (хаику дневник)“ е редок творечки потфат: поместува 259 хаику творби, кои ни нудат поетски екстракти за различни денови од годината, па затоа градат еден вид „дневник“. Геслото „Ни ден без напишан ред“ кај Васко Марковски се претвора во „Ни ден без хаику“, што секако потсетува на идејата на Масаока Шики: „Сè е хаику“, а оваа книга како да е најдобра поткрепа на тезата на јапонскиот хаику мајстор.

Следејќи го ритамот на промените во природата, поетскиот ракопис на Васко Марковски ни приредува возбудливо патување низ годишните времиња (започнува со зимски пејзажи, нè води низ сите суптилни промени на климите, сетинзите и расположенијата низ пролетта, летото и есента), а завршува со новогодишно хаику – напиша Владимир Мартиновски.

Васко Марковски е туристички водич, патеписец и литературен преведувач. Завршил студии по турски јазик и книжевност со чешки јазик и книжевност. Дваесетина години работел како новинар во повеќе медиуми (радио, печат и мултимедија).

Во периодот од 2008-2011 бил главен и одговорен уредник на месечникот „Free time guide – Macedonia“, а за неговите патеписи е награден со признанието „Најдобар промотор на Македонија“ за 2010 година.

Автор е на поетската книга „Корпоративно утро“, на монографијата „Урбани легенди“, збирката репортажи „Непозната Македонија“ и збирката поезија „Скопски улици“. Реализирал изложба на фотографии „Комши камерџик“, од турски на македонски јазик превел повеќе дела, меѓу кои и сто песни од познатиот турски поет Орхан Вели („Риба во шишето ракија“, „Антолог“, 2014).

(Текстот е објавен во „Културен печат“ број 274, во печатеното издание на весникот „Слободен печат“ на 29-31.3.2025)