Музичкиот новинар Михајло Грбевски – Мишко ја објави својата прва книга со собрани интервјуа под наслов „Rock n’ beat“, чија промоција ќе се одржи на 18 јули (петок), во 12 часот на пладне, пред музичкиот салон „До-ре-ми“ во Младинскиот културен центар во Скопје.

Промоцијата ќе се одржи во рамки на „Скопско лето“, промотори ќе бидат Тони Димков – новинар од областа на културата и Ненад Георгиевски – музички новинар, додека музичката поддршка на настанот е на Јаков Дренковски.

Во книгата се објавени 46 интервјуа од дведецениската новинарска кариера на Грбевски во неколку печатени медиуми, дневни весници и неделници („Екран“, „Ритам“, „Време“, „Нова Македонија“). Книгата има четири циклуси – „Рок пролет“, „Вечен бунтовник“, „Валкан Балкан“ и „Звукот на подземјето“.

Михајло Грбевски (1977) е роден во Скопје, каде го завршува своето образование. Со рок-музика се „инфицира“ уште од најмала возраст слушајќи ги винилните плочи и касети од своите родители, за подоцна сам да ги открие тајните на светските, балканските и македонските музичари и групи и да го оформи својот музички вкус.

Со текот на времето почнува да прави своја музичка колекција на винилни плочи и постојано ги посетува музичките рок-концерти, кои се одржувале во Скопје, но и во останатите македонски градови. Уште во тинејџерските години почнува да се интересира за пишувањето за урбаната култура, пред сѐ, за музичката критика.

Имајќи предвид дека се интересира и ја поддржува македонската андерграунд сцена, во 2003 година станува селектор на групите кои се натпреваруваат на фестивалот „Рок-фест“, за на крајот да стане и програмски директор на фестивалот.