Изборната кампања за парламентарните избори во Албанија завршува вечерва на полноќ. По еден месец на терен, политичките партии денеска ја завршуваат својата кампања, а на 11 мај, албанските граѓани ќе излезат на гласање.

Двете најголеми политички сили, Социјалистичката партија на Албанија на премиерот Еди Рама и Демократската партија на главниот опозиционер Сали Бериша со своите сојузници, ќе ја затворат кампањата во Тирана, округот за кој се води најсилната битка за 11-те мандати.

Социјалистичкиот лидер Еди Рама се бори за четврти мандат, додека опозицијата, составена од Демократската партија и нејзините сојузници, се стреми да владее во следните 4 години. За прв пат, нови партии го „загрозуваат“  – двете водечки партии СП-ДП и се стремат кон места во Собранието.

Во овој месец од кампањата, Социјалистите се фокусираа на европската интеграција. Еди Рама изјавува дека само со Социјалистичката партија ќе биде можно опстојување на европскиот пат на Албанија која минатата година ги започна пристапните преговори за членство во ЕУ.

Од друга страна, лидерот на Демократската партија, Сали Бериша, зборува за промени, додека лидерите на другите нови партии бараат гласови од Албанците за да ја отстранат старата политичка класа.

Утре е изборен молк во Албанија и забранета е каква било политичка активност, меѓу другото и на објавување анкети или изборни апели, додека во недела, 11 мај, 3,7 милиони Албанци ќе гласаат за новиот Парламент.

За прв пат гласа и дијаспората, при што се регистрирани 245.935 албански емигранти.