Џоел Ембид, еден од најдобрите кошаркари на Филаделфија сиксерс, нема да игра до крајот на сезоната 2024/2025 поради проблем со левото колено, соопшти вечерва НБА клубот.

Сиксерс објави дека Ембид и експертите заклучиле дека тој е „медицински неспособен за игра“ и дека остатокот од сезоната ќе го посвети на лекување и рехабилитација.

Оваа вест е тежок удар за екипата која моментно има учинок 20-38 и е во серија од девет порази.

Ембид одигра само 19 натпревари оваа сезона, со просек од 23,8 поени, 8,2 скока и 4,5 асистенции по натпревар. Неговите бројки, иако импресивни за повеќето играчи, беа далеку под просекот во кариерата на овој поранешен МВП.

Ембид имаше најнизок просек на поени од сезоната 2017/18, најмал број на скокови по натпревар од неговата дебитантска сезона и најнизок процент на голови од поле во кариерата од 44,8%.