Зо второто барање на Бугарија за исплата на средства во рамките на Механизмот за опоравување и отпорност (РРФ), Европската комисија денеска даде позитивна оценка, иако тврди дека едно барање поврзано со телото за борба против корупцијата не е исполнето, поради што реши да одобри само делумна исплата на поддршката, објави bnr.bg.

„Станува збор за постапка за делумна исплата, при што во оваа фаза не ја објавуваме сумата, но испративме писмо до Бугарија во кое ги информиравме за износот што ќе биде суспендиран доколку оваа препорака не биде исполнета“, рече портпаролот на ЕК за кохезија и реформи Мачеј Берестецки.

Тој додаде дека Бугарија сега има рок од еден месец да одговори на забелешките и ако по добиениот одговор ЕК оцени дека препораката се уште не е исполнета, тогаш ова исплатата ќе биде суспендирана за уште шест месеци.

На прашање за потврда на износите што го соопшти бугарскиот премиер Росен Жељазков, кој изјави дека Европската комисија во рамките на РРФ на Бугарија ќе и исплати 440 милиони евра, додека преостанатите 200 милиони засега ќе останат замрзнати, Берестецки повтори дека во оваа фаза ЕК нема да соопшти за колкава сума станува збор, додавајќи дека таа им е позната на бугарските власти и не претставува изненадување ако тие ја обелоденат.