Полицајците кои упаднале во имот во близина на главниот град на Мексико заплениле 25 егзотични животни, вклучувајќи лавови, пуми и бенгалски тигар. Тие биле предупредени за „сомнителна активност“ на ранчот во Хуиксилукан, западно од Мексико Сити, пренесува „Би-Би-Си“.

Тие, исто така, откриле пумпи за кои се смета дека биле користени за кражба на бензин од цевководи за гориво. Криминалците во Мексико често чуваат егзотични животни како домашни миленици и голем број големи мачки беа запленети во последниве години.

Се претпоставува дека местото каде што се пронајдени животните го користела банда специјализирана за крадење и продажба на гориво. Агентите пронашле контејнер со 14.000 литри дизел, како и неколку големи возила како камиони и автобуси, за кои велат дека можеби се украдени.

На имотот имало вкупно 47 живи животни, од кои некои биле чувани во кафези. Тие заплениле и седум мртви животни. Трговијата со животни е профитабилен бизнис во Мексико, при што криминалните банди сѐ повеќе купуваат и продаваат егзотични видови за профит.