Казахстанската антикорупциска агенција денеска извести дека запленила дијаманти и накит во вредност од над 230 милиони долари како дел од аферата во која е вмешан внукот на поранешниот претседател Нурсултан Назарбаев.

„За време на операцијата за пребарување во странство, запленети се дијаманти и накит во вредност од над 230 милиони долари и вратени на државата“, се вели во соопштението на агенцијата.

Накитот е запленет како дел од новата истрага против бизнисменот Кајрат Сатибалди, внук на поранешниот претседател Нурсултан Назарбаев, кој беше на власт 30 години, до 2019 година, додаде агенцијата за борба против корупцијата за АФП.

Сатибалди, уапсен во март и обвинет за злоупотреба на пари од Казахтелеком, државниот телекомуникациски оператор, и „други злосторства против државната безбедност“, е првиот член на семејството Назарбаев кој е уапсен. Во септември тој беше осуден на шест години затвор.

Според антикорупциската агенција, „300-те милиони долари што Сатибалди ги инвестирал во странски обврзници ќе бидат уплатени во буџетот на Казахстан“, голема централноазиска земја богата со нафта и гас.

Минатиот јануари во протестите низ земјата животот го загубија повеќе од 230 луѓе. Актуелниот претседател Касим-Жомарт Токаев оцени дека биле поттикнати од странски „терористи“ кои сакале да ја преземат власта во земјата, но за тоа никогаш не презентираше докази.

Токаев, кандидат за реизбор на 20 ноември, оттогаш се обидува да ја зајакне својата позиција и да ја ослабне позицијата на неговиот авторитарен претходник.