Палестинската самоуправа денес објави дека еден Палестинец е убиен од израелски оган во северниот окупиран Западен Брег, каде што израелската армија соопшти дека „неутрализирала“ маж кој избодел и ранил војник за време на операција. Мажот бил изгазен и со воено возило.

„Ахмад Али ал-Амур (55 години) беше убиен од окупаторските сили во градот Румана (околу десет километри северозападно од градот Џенин) утрово“, објави палестинското Министерство за здравство.

🚨 West Bank

Palestinian man Ahmad Ali Amour was executed by the Israeli occupation forces by being shot and then run over by a military vehicle in Rummanah, west of Jenin, in the occupied West Bank. pic.twitter.com/28k46LR0Ev

— Inés El-Hajj|Stories from Palestine 🇵🇸 (@InesStories99) July 10, 2025

„За време на (воените) операции во областа Руманах, терорист избоде (израелски) војник и лесно го рани“, соопшти израелската армија, додавајќи дека напаѓачот е „неутрализиран“.

Насилството ескалираше на Западниот Брег, кој Израел го зазеде во 1967 година, од почетокот на војната во Појасот Газа во октомври 2023 година.

Оттогаш, најмалку 951 Палестинец, вклучувајќи борци и многу цивили, се убиени од израелски војници или еврејски доселеници, според бројките на палестинската власт.

Во истиот период, најмалку 35 Израелци, вклучувајќи цивили, се убиени во напади на Палестинци или за време на напади на израелската армија.

Покрај тоа, израелската армија започна голема операција во северниот дел на Западниот Брег во јануари – главно во Џенин, Тулкарем и Наблус, упоришта на вооружени палестински организации.