Заменик-министерот за финансии Филип Николоски во Вашингтон се сретна со алтернативниот извршен директор на Меѓународниот монетарен фонд Лук Дресе и со шефот на мисијата на ММФ, Жак Миниан. Од Министерството за финансии информираат дека во фокус на средбата биле економските состојби и политики во земјава при што заменик-министерот Николоски ја потенцирал заложбата на Владата за обезбедување долгорочна фискална одржливост.

Само стабилни јавни финансии можат да обезбедат долгорочен раст и развој, насочен кон подобрување на животниот стандард на граѓаните. Во наредниот среднорочен, петгодишен период продолжува определбата расходите да бидат во функција на остварување на стратешките приоритети, забрзување на економскиот раст, исполнување на интегративните процеси на Република Северна Македонија за влез во ЕУ и обврските што произлегуваат од членството во НАТО, истакнал Николоски.

На средбата се дискутирало и за степенот на реализација на активностите од програмата за користење на Линијата за ликвидност и претпазливост (ПЛЛ), која обезбедува ефективна заштита од криза за оние земји членки на ММФ кои имаат здрави економски основи, односно политики.

Заменик-министерот за финансии во Вашингтон ќе оствари средби и во Светската банка, каде ќе се сретне со извршниот директор на СБ, Кун Давидсe и директорот за човечки развој Мајкл Рутковски.