Заменик-министерката за правда Викторија Аврамовска-Мадиќ не се појавува во јавноста да објасни кој е автор на спорните измени на Кривичниот законик, со кои ем од затвор ќе се спасат многу фукционери, ем граѓаните ќе им плаќаат милионски суми отштета откако делата ќе им застарат, како и надомест за судските и адвокатски трошоци направени во текот на бројните судски рочишта и други постапки. Таа не одговара на телефонските повици на „Слободен печат“, за да ѝ одговори на јавноста за прашања што се од висок јавен интерес и за кои досега покажа целосна нетранспарентност, а згора, дава и лажни информации на медиуми на барања за слободен пристап до информациите.

Аврамовска-Мадиќ вчера беше прозвана од министерот за правда Кренар Лога, кој на брифинг со новинарите рече дека токму таа е носител на процесот за промена на законот и предлагач на конкретните законски измени, со кои тој лично не се согласува и дека одговорноста што овие измени се дел од правниот поредок е нејзина, како и на пратениците што ги изгласаа.

Лога ги упати новинарите од неговата заменичка да ги бараат одговорите кој ги напишал измените на член 353 со кои се намали затворската казна за злоупотребата на службената положба и овластувања, како и измените на член 394 со кои се намали казната за злосторничко здружување, но таа засега не одговара на телефонските повици и СМС-пораки.

Аврамовска-Мадиќ до медиумот „Само прашај“ завчера испратила решение за исправка на нејзиното претходно решение за слободен пристап на информации, со кое даде лажен исказ дека автори на законските измени се експертите од работната група што го подготвува новиот Кривичен законик. Но, во новиот одговор таа само навела дека експертите не се автори на законските измени, а не одговорила на прашањето на медиумот кои се авторите.

Дел од посочените автори од работната група веднаш ја демантираа заменик-министерката и изјавија дека не само што тие не се автори на измените на спорните членови, туку и дека во делот од измените што го презеле од работната група за проширена конфискација е направена грешка. И министерот Лога вчера категорично демантираше дека експерите од работната група не се автори на спорните измени, а доколку заменичката не испрати исправка на решението дадено по Законот за слободен пристап до информации, треба да сноси одговорност за давање на лажен исказ.

Со измените на Кривичниот законик ќе застарат голем број од делата на поранешните функционери на ВМРО-ДПМНЕ и ќе пропаднат предметите што ги водеше поранешното Специјално јавно обвинителство, како ТНТ, Талир 1 и 2, Титаник 1 и 2, Топлик, Траекторија, Трезор, Таргет-Тврдина, Тарифа, Тендери, Дизајн. Од ВМРО-ДПМНЕ пак, обвинија дека со измените ќе застарат и кривичните дела на функционерите на оваа власт.