На денешната седница на Советот на Битола, во дебатата околу справувањето на градот со кучињата-скитници, координаторот на советничката група на ВМРО-ДПМНЕ и заменик-градоначалник на Битола, Бојан Бојкоски, рече дека „проблемот“ со каснувањата од бездомни кучиња „на некои битолчани и одредена група на адвокати им носи добра заработувачка“.

„Тврдам дека во Битола има организирана група која што работи во болницата и адвокати кои што прават организиран криминал. Тие му се јавуваат на луѓето кога ќе ги каснат кучињата скитници уште не излезени од болницата и му велат “јас ќе ти бидам адвокат”. Ова е организиран криминал што се случува во Битола и граѓаните тоа треба да го знаат. Ги повикувам надлежните институции да го испитаат овој случај. Дури има и фингирани каснувања од бездомните кучиња“, рече Бојкоски на денешната седница на Советот.

Инаку, каснувањата на кучињата скитници досега скапо ја чинат Општината Битола.

Според некои информации Општината Битола како оштета на каснатите граѓани од кучињата скитници има исплатено околу 50 илјади евра.