Околу 800 луѓе кои „немале добри намери“ се исклучени од работата во организацијата на Олимписките игри во Париз од страв за безбедноста на Игрите, изјави францускиот министер за внатрешни работи Жералд Дарманан.

Безбедносните сили ги проверуваат сите што најверојатно ќе дојдат во контакт со Олимписките игри: волонтерите, носителите на факелот, луѓето кои ќе ја пречекуваат публиката.

– Милион проверки треба да се направат. Ние веќе извршивме 180.000 проверки. Исклучивме 800 луѓе. Списокот вклучува 15 за кои се смета дека претставуваат најсериозна закана за националната безбедност. Тоа значи дека има луѓе кои сакале да се пријават да го носат пламенот, да бидат волонтери на Олимписките игри и кои очигледно немале добри намери – рече Дарманан.

Тој прецизира дека меѓу исклучените има „радикални исламисти“ и „радикални еколошки активисти кои сакаат да протестираат“. Тој исто така рече дека 102 агенти од приватни агенции за обезбедување неодамна биле исклучени од Олимпијадата.

Француските безбедносни сили проверуваат до милион луѓе пред Олимписките игри, вклучувајќи спортисти и луѓе кои живеат блиску до клучната инфраструктура, според Министерството за внатрешни работи.

Пред отворањето на 26 јули, сите 10.500 спортисти учесници на Олимпијадата и 4.400 за Параолимпијадата ќе бидат подложени на проверка, исто како и нивните тренери и медицински персонал, покрај 26.000 акредитирани новинари.