Одлуката на групацијата Мета (Фејсбук, Инстаграм, Ватсап) да престане да користи програми за „проверка на факти“ – како што е популарно познат процесот на вкрстување и потврдување информации или факти – на Фејсбук и Инстаграм за САД предизвикува „голема загриженост“ во Австралија, изјави денеска министерот за финансии на земјата Џим Чалмерс.

Австралија, која е во првите редови на земјите во регулирањето на технолошките гиганти, е загрижена за влијанието на дезинформациите на социјалните мрежи, објасни австралискиот министер за финансии.

„Дезинформациите се многу опасни и видовме дека достигнуваат експлозивни нивоа во последниве години“, истакна тој, зборувајќи за националната мрежа Еј-би-си.

„Ова е многу штетен развој, кој ѝ штети на нашата демократија. Тоа може да биде штетно за менталното здравје на луѓето кои добиваат дезинформации на социјалните мрежи и затоа секако сме загрижени за овој проблем“.

Групата на Марк Цукерберг во вторникот објави дека ја прекинува својата програма за информации и проверка на факти во САД и ја заменува со систем „белешки на заедницата“ сличен на она што го користи платформата Икс.

Најавата на Мета дојде додека републиканците во САД, како и сопственикот на конкурентскиот социјален медиум Икс, Илон Маск, постојано протестираа против програмите за проверка на фактите, кои ги споредуваат со „цензура“.

„Австралиската влада инвестира во доверливи даватели на вести, како што се јавниот радиодифузен сервис Еј-би-си и националната новинска агенција Еј-еј-пи, за да се осигура дека луѓето имаат пристап до веродостојни информации“, потсети Чалмерс.

Дезинформациите стануваат „поголема компонента на нашите медиуми, особено нашите социјални медиуми“, истакна тој. Австралија често ги нервира дигиталните гиганти, особено Икс, со нејзините напори да го спречи преносот на лажни информации или содржина што се смета за опасна.

На крајот на минатата година, земјата донесе нови закони со цел да им забрани на малолетниците под 16-годишна возраст да се регистрираат на платформите на социјалните медиуми. Но, во ноември владата беше принудена да се откаже од плановите да ги казни компаниите за социјални медиуми доколку не успеат да го спречат ширењето на дезинформации.

Премиерот Ентони Албанес вчера, среда, подвлече дека неговата порака на социјалните мрежи е дека „тие имаат општествена одговорност и мора да ја преземат“. Тој, исто така, потврди дека неговата влада има намера да ја спроведе забраната за социјалните мрежи за малолетници помлади од 16 години.

Австралискиот надзорник за дигитални права „Диџитал рајтс воч“ рече дека Мета донел „многу лоша одлука“, обвинувајќи го гигантот дека се поклонува на барањата на новоизбраниот американски претседател Доналд Трамп.

Австралиската организација за проверка на факти AAP FactCheck објави дека нејзиниот договор со Мета во Австралија, Нов Зеланд и Пацификот не е засегнат од американската одлука на групата.

Оваа организација моментално работи на 26 јазици со програмата за верификација на фактите на Фејсбук, според која Фејсбук плаќа за користење на верификацијата на фактите на околу 80 организации ширум светот на платформата, како и на Ватсап и Инстаграм.