Познатиот шкотски алпинист Рик Ален загина во лавина при обид да го освои врвот К2 на северот на Пакистан, соопштија властите на таа земја.

Ален загина пред три дена додека се обидуваше да го достигне врвот преку нова рута, од југоисточната страна на планината, изјави секретарот на планинарскиот клуб на Пакистан, Карар Хаидри.

Двајцата партнери на Ален ја преживеаја лавината и беа спасени, додаде Хаидри.

Нивната експедиција имаше за цел да собере пари за добротворна организација со седиште во Велика Британија, во која Ален беше член на управниот одбор. Организацијата која работи за благосостојба на децата, ја потврди смртта на Ален.

Ален беше искусен планинар, а во 2018 година беше спасен од лавина при освојување на врв кој, како К2, се наоѓа на ланецот Каракорам на границата со Пакистан и Кина.