Неодамнешната блокада на Суецкиот канал, што беше предизвикана од гигантскиот брод со контејнери „Евер Гивен “, кој се заглави во него, предизвика сериозно загадување на сулфур диоксидот, пренесува Би-Би-Си.

Имено, поради блокадата на Суецкиот канал, стотици бродови заглавија од двете страни на Суецкиот канал, и беа принудени со денови да стојат на истото место.

Поради тоа, концентрацијата на сулфур диоксид (SO2) во воздухот достигна пет пати поголема вредност од вообичаеното на медитеранската страна на каналот. Сулфур диоксидот е нус-производ на согорување на горивото што го користат морските мотори.

Меѓународната поморска организација (ИМО) во последните години се обидува да ги намали емисиите на сулфур диоксид поради негативното влијание што може да го има врз животната средина и здравјето на луѓето, јавува Би-Би-Си .

Загадувањето е снимено со сателит

Поради блокадата на Суец, која траеше цели шест дена, дури 350 бродови заглавија на истото место. Повеќето беа закотвени на северниот крај на каналот, во Медитеранот. Иако нивните главни мотори беа исклучени, на бродовите сè уште беа  вклучени помошните напојувања и бојлери.

Ова доведе до голема концентрација на сулфур диоксид во атмосферата, што беше откриено и од европскиот сателит Sentinel-5P.  Сателитот, управуван од Европската вселенска агенција, има чувствителен спектрометар наречен Тропоми, кој може да открие траги од голем број штетни гасови, вклучувајќи сулфур диоксид.

Египетските власти поради финансиски спор со сопственикот го запленија товарниот брод што го блокираше Суецкиот канал минатиот месец.

Генерал-потполковник Осама Раби, претседател на управата на Суецкиот канал, рече дека бродот нема да може да ја напушти земјата додека не се исплати надоместокот.

“Бродот сега е официјално запленет. Тие не сакаат да плаќаат ништо”, рече тој.

Сопственикот на бродот не даде никакви изјави.

Раби не кажа колку пари бара управата на каналот, но има тврдења дека се работи за најмалку 900 милиони долари.

Египетската управа на Суецкиот канал (СЦА) бара отштета од сопственикот на бродот од Јапонија од 916 милиони долари, објави Ројтерс повикувајќи се на два извори. 

Тука е вклучен  и надоместокот за спасувачката операција, трошоците предизвикани од блокирањето на сообраќајот во каналот и изгубените такси за транзит.

„Евер Гивен“ се насука на шест километри северно од јужниот влез на каналот, што е еднонасочно на тоа место, во близина на градот Суец. Тоа ги принуди некои бродови да тргнат на долга алтернативна патека од 5.000 километри околу Ртот на добра надеж, во јужниот дел на Африка, што ги чинеше сопствениците на бродови стотици илјади долари гориво и други трошоци. Другите чекаа да се одблокира каналот.