Во Вишото јавно обвинителство во Ваљево денеска беа изнесени на сослушување тројца поранешни и сегашни инженери од холдингот „Крушик“, осомничени дека на „АТС груп“ од Северна Македонија, на бизнисменот Шевкет Демировски, ѝ доставиле доверливи информации и документација.

За шпионската афера се огласи и српскиот претседател Александар Вучиќ со оценка дека Северна Македонија е само проточен бојлер кон други служби во регинот.

– Ова трае долго време, тоа го прават од сите страни. Ова го следиме долго време. Точно знаеме за кого станува збор, преку кого тоа одело и кој бил и кој требало да биде крајниот корисник. Северна Македонија е „проточен бојлер“ на некои други служби во регионот – изјави Вучиќ.

Во вчерашната акција на Безбедносно информативната агенција, Воено-бебедоносната агенција, МВР и Вишото јавно обвинителство во Ваљево, уапсени се тројца инженери од српската фабрика за производство на оружје и муниција „Крушик“ поради постоење основи за сомнение дека сториле кривично дело шпионажа затоа што во текот на 2024 година континуирано контактирале со државјани на Северна Македонија, вработени во компанијата „АТС груп“, на чело со Шевкет Демировски.

– Осомничените М.О. (1987), Д. Л. (1960) и Д. М. (1961), се поранешни и сегашни инженери во холдинг компанијата „Крушик“ од Ваљево, кои од оваа фирма неовластено изнесувале доверлива деловно-техничка документација и ја предавале на странска организација, на штета на безбедносните, одбранбените, воените и други интереси, како и слабеење на моќта на Република Србија, се прецизира во соопштението на МВР.

Експертите од одбранбената индустрија во Србија се сомневаат дека Демировски е, всушност, параван за многу посериозни играчи.

Приведени тројца инженери од „Крушик“ во Ваљево поради сомнеж за шпионажа за „АТС груп“ од Македонија