Собранието најверојатно ќе ја тргне од дневен ред интерпелацијата за претседателот на Уставниот суд Дарко Костадиновски, поднесена од Европскиот фронт. Со тоа за довербата за работата на Костадиновски, пратениците нема ни да расправаат, зашто според сценариото за седницата в среда, за кое брифираше претседателот на Собранието Африм Гаши, е на барање на пратеник да се тргне точката за интерпелација од дневниот ред.

Нема јасен одговор зошто пратениците имаат дилема дали Собранието треба да расправа за интерпелација за претседател на Уставен суд, кога неодамна на пратениците не им беше проблем да расправаат и да им изгласаат недоверба на пет члена на Судскиот совет, избрани од Парламентот. ДУИ останува на ставот дека интерпелација за Костадиновски треба да има, во спротивно Собранието наместо дом на граѓаните, ќе се претвори во акционерско друштво.

Гаши информираше дека за ова прашање разговарале на координација со шефовите на парламентарните групи и дека сите, со исклучок на отсутните претставници од ДУИ, се изјасниле дека не е добро Собранието да врши интерпелација за претседател на Уставниот суд, кој е избран од Судот.

– Интерпелацијата е ставена на дневен ред. На координација се отвори дискусија дали добро сме постапиле. Ова беше дилема на мојот кабинет, но ние се водевме од членот 72 од Уставот и членот 47 од Деловникот во кои се вели дека интерпелација може да се покрене за носител на јавна функција. Ние како Собрание мора да го процесираме тоа. Од друга страна, зборуваме за судска власт. Може некој од пратениците да бара да се тргне таа точка од дневен ред. Главно, кај сите координатори преовладуваше перцепцијата дека не е добро Собранието да врши интерпелација на претседател на Уставен суд. Ќе видиме како ќе реши пленумот – рече Гаши.

Тој додаде дека за да се разјаснат дилемите за кои функционери Собранието може да расправа за нивна одговорност, ќе иницира Комисијата за деловнички и имунитетни прашања да заседава, а можна е и јавна расправа за да се дефинира прецизно зборот јавна функција.

– Треба правно да разјасниме за да не остане само на волја на претседателот на Собранието како ќе ја толкува како индивидуа, туку да оставиме институционална трага како да се постапува по вакви иницијативи – вели Гаши.

Претседателот на Собранието самиот не ја повлекол точката од дневен ред, зашто на координацијата немало претставник на ДУИ како подносител на интерпелацијата. На прашањето – зошто Собранието немало дилеми кога расправаше и ги изгласа интерпелациите за членовите на Судскиот совет, Гаши вели дека претседателот на Уставниот суд е избран од Судот. Но, при одлуката Гаши да ја стави на дневен ред интерпелацијата за Костадиновски, ставот беше дека и Костадиновски за уставен судија е избран од Собранието, а потоа Уставниот суд го избрал за претседател. СДСМ веќе се изјасни дека нема да ја поддржи интерпелацијата. Дека не треба Собранието да расправа за работата на Костадиновски, смета и ВМРО-ДПМНЕ.

Од ДУИ за „Слободен печат“ велат дека Собранието треба да расправа за работата на Костадиновски.

– Интерпелација за Костадиновски треба да има како што имаше за петте члена на Судскиот совет избрани од Собранието. Ако ја тргнат точката од дневен ред, ќе реагираме, но тоа ќе биде потврда дека се плашат од вистината. Ќе потврдат дека Собранието го претвораат во акционерско друштво, а не како што треба да биде – дом на сите граѓани – вели Блерим Беџети, координатор на Европскиот фронт.

Костадиновски, пак, веќе се изјасни дека нема да присуствува на седницата за интерпелација. Гаши веќе потврди дека Костадиновски ниту писмено ниту усно пред пратениците нема да излезе во одбрана на својата работа.
Кога реши интерпелацијата да ја стави на дневен ред, Гаши соопшти дека секоја иницијатива поднесена од пратениците, доколку е во согласност со Уставот и Деловникот и законите, ќе биде процесирана со целосно почитување на законите и демократските стандарди. Тој и тогаш се повика на Уставот и, според него, „овие одредби не се предмет на слободно толкување, туку нивна примена“. Тогаш за Гаши не беше спорно пратениците да расправаат за одговорноста на Костадиновски, зашто тој е носител на јавна функција, наспроти одговорот од Уставниот суд дека „Уставот не предвидува никаква можност за разрешување на уставен судија ниту од страна на законодавната, ниту од извршната власт“.

Од Уставниот суд посочија дека во март годинава излегле со став дека Уставот не предвидува никаква можност за разрешување на уставен судија ниту од страна на законодавната, ниту од извршната власт, а институтот „интерпелација“, предвиден со членот 72 од Уставот, во никој случај не се однесува и не може да се примени за уставните судии.

Европскиот фронт поднесе интерпелација за работата на Костадиновски врз основа на член 72, став 1 и став 2 од Уставот. Според пратеникот на ДУИ Илир Хасани, Костадиновски свесно го прекршил Законот за употреба на јазиците. Тој тогаш нагласи дека иницијативата нема за цел да изврши притисок врз Уставниот суд, за разлика од другите претходни интерпелации кои биле јасни од политичка природа, туку има социјална и медиумско влијание.

– Нашата цел е да поведеме институционална дебата за функционирање на оваа институција и улогата на нејзиниот претседател во почитување на Уставот и постојните закони – рече тогаш Хасани.

Европски фронт поднесе интерпелација за претседателот на Уставниот суд