Кога ќе завршат изборите во Бугарија предвидени за првата недела од април, ќе продолжат разговорите на долгорочна основа за отворањето на македонски културен центар (МКЦ) во Благоевград, најави премиерот Димитар Ковачевски.

По посетата на штипскиот универзитет „Гоце Делчев“ Ковачевски информираше дека Министерството за култура ги направило сите подготовки и целиот елаборат во врска со отворање на МКЦ во Благоевград, кој потоа бил доставен до Министерството за надворешни работи. Притоа тој истакна дека и министерот за надворешни работи разговарал со неговиот колега од Бугарија околу отворањето на МКЦ во Благоевград, но Бугарија во моментов работи со техничка влада.

-Проценките беа дека ќе успее таму да се направи политичка влада, со која ќе може да се разговара подолгорочно, меѓутоа Бугарија повторно ќе оди на избори во првата недела на април. Штом ќе завршат со нивното политичко екипирање и со изборите, ќе можат да продолжат разговорите на долгорочна основа во однос на тој дел – рече Ковачевски.

Тој додаде дека барањето веќе го имаат подготвено и за него е разговарано, но со техничката влада во Бугарија.

-За овие прашања ние разговараме. Ние, кога отворивме канцеларија на МИА во Софија, тоа беше направено врз основа на добра волја на властите во Софија и во Скопје. Исто така, имаме МКЦ во центарот на Софија, каде е сместена и МИА, како што Бугарија има културен центар во Скопје. Тоа е начин накој две држави ги регулираат своите односи на планот на информирање и размена на културните вредности – изјави Ковачевски.