Во изминатите 24 часа во земјава се евидентирани вкупно 33 пожари на отворен простор, од кои седум се сѐ уште активни,  под контрола се седум, а 19 се целосно изгаснати, информира утрово Центарот за управување со кризи (ЦУК).

Активни пожари се регистрирани во општините Василево, Радовиш и Берово – поточно во село Нивичино, планина Голем Готен и Малешевските Планини, каде што гори нискостеблеста шума, смрека, грмушки и ниска вегетација.

Горски пожари сè уште беснеат и во прилепското село Бешиште (Бешишки Рид), во село Црешнево (општина Македонски Брод), во селата Драгоево и Селце (Штип), во село Нивичани (Кочани), село Јунузлија (Карбинци) и во село Гумалево (Зелениково).

Под контрола се пожарите меѓу селата Царевиќ и Смолани (Радобилски Рид), во Латово (Маркова Стапалка), меѓу селата Локвица и Крапа, кај селото Грешница (Македонски Брод), во село Долно Перово (Ресен) и меѓу селата Церово и Групчин (Желино).

Надлежните апелираат на внимателно однесување на отворен простор и навремено пријавување на евентуални нови пожари.