За два дена во ЕСМ биле пријавени 600 дефекти на парно
Во саботата официјално започна грејната сезона и се смлачија радијаторите во објектите, освен во оние кои се исклучени поради дефекти на внатрешната инсталација или поради проблеми во потстаницата. Како што може да се види на веб страната на БЕГ каде се уште се објавува прегледот на исклучените објекти, во моментов 69 станбени згради и институции се без греење, иако од ЕСМ тврдат дека биле пријавени 600 дефекти. Меѓу оние кои немаат греење во моментов се градинката „Срничка“, ОУ Лазо Ангеловски, Педагошка Академија, Здравствен дом Идадија, ЈП „Македонска пошта“, Општина Кисела Вода, Агенција за спорт и млади.
Препорачано
Од ЕСМ информираат дека нема дефекти во топланите и дистрибутивната мрежа за парно греење во Скопје и дека тие се целосно функционални. Како што е вообичаено на почетокот на цекоја грејна сезона се интервенира по повици на граѓани за дефекти во домовите или на потстаниците во зградите.Во првите два дена од стартот на грејната сезона, според директорката за производство од АД ЕСМ Александра Маројевиќ пријавени биле околу 600 дефекти од потрошувачите на топлинска енергија, а најголем број од нив поради истекување од внатрешни инсталации.
Овие дефекти не можат да се предвидат од наша страна, ниту од страна на корисниците. Во таков случај нашите екипи ја прекинуваат испораката на топлинска енергија во тие потстаници сè додека кај корисниците не се отстранат дефектите од истекувањето – рече Маројевиќ.
Приоритет на сервисните екипи на терен, според директорката, имаат рекламациите за течење, затоа што тие можат да предизвикаат материјална штета во домовите. Сите останати рекламации за немање греење сеизвршуваат од сервисните служби на терен по редослед „прв јавен, прв услужен”.
Во Скопје околу 60 илјади домаќинства се приклучени на мрежата за централно греење што ја покриваат топланите Исток и Запад, а околу 500 домаќинства во Чаир и Топанско поле се приклучени на мрежата на топланата Скопје Север. Трите топлани имаат можност да работат на природен гас или на мазут, а по потреба и на дизел, додека ТЕ-ТО, може да работи само на природен гас.
