Сојузот на здруженија на дијабетичарите предводен од претседателот Диме Велев, бара поддршка од 15 пратеници во Собранието, кои би застанале зад идејата да се формира надзорна расправа за последниот тендер на Министерството за здравство во кој беа набавени ленти за мерење на шеќерот и глукомери.

Глукомерите за Велев се спорни од повеќе причини, меѓу кои пакувањето во кои што дошле во инсулинските аптеки, а кое е во пластични ќесиња и надвор од оригиналното пакување.

Националната комисија за дијабетес излезе со став дека ги уверува пациентите во точноста и безбедноста на апаратите и лентите за мерење на шеќерот. Но, според Велев, на состанокот не одело се така мазно.

-На тој состанок, пациентка ги донесе сите шест глукомери што ги имаме добивано до сега од Министерството низ годините и ги донесе и лентите што сега ни се поделени со последниот тендер. И на сите им демонстрираше, дека на два од шесте апарати, лентите пасуваат. Тоа не би смеело да се случи во ниеден случај и по ниеден стандард, изјави Велев за „Слободен печат“.

Од Агенцијата за лекови и медицински средства МАЛМЕД вчера на брифинг посочија дека во тендерот не било предвидено апаратчињата да доаѓаат во сет (заедно со други делови меѓу кои и ланцетите и течноста за проверка), туку на тендерот се барал само главниот дел од сетот што е всушност апаратот, па затоа истите биле препакувани во најлонски ќесиња и дистрибуирани до пациентите. Според МАЛМЕД, увозот на глукомерите е извршен законски, со платена царина под царински код. Во МАЛМЕД овие глукомери од производителот „Тајсон Био“ се регистрирани и имаат дозвола за увоз и пуштање во промет. На нив, според МАЛМЕД има код, производител, а отпечатено било и упатството за користење.

Од Јавното обвинителство ја следат состојбата.

„Јавното обвинителство до овој момент нема оформено предмет, но ги следи сите информации и доколку бидат утврдени елементи на кривично дело или биде доставена кривична пријава, обвинителството ќе постапи согласно своите надлежности и ќе ги провери наводите“, велат од ЈО за „Слободен печат“.

 До крајот на неделата претставници од Здруженијата на дијабетичари, како и пациенти со дијабет ќе бидат повикани на средба со министерот за здравство на која ќе им се презентира целосната документација за апаратите и лентите, како и целиот процес на набавка од МАЛМЕД и Националната комисија за дијабетес.

Законот за здравствена заштита и програмата на владата ги обврзува владата и Министерството за здравство да набавуваат ленти и апаратчиња за мерење на вредностите на шеќерот кај пациентите но тендерот не беше распишан на време и пациентите самите беа приморани да ги набавуваат за менаџирање на дијабетесот. Тие се пожалија кај Народниот правобранител и побараа од него да застане во заштита на пациентските права, а во Министерството за здравство испратија претставки со кои бараат да им бидат рефундирани сите пари кои минатите 9 месеци ги давале од сопствен џеб затоа што инсулинските аптеки ги немале потребните количества на ленти.

На 23 ноември 2022 Европскиот Парламент донесе резолуција за намалување на бројот на луѓе во преддијабетна и дијабетна состојба во сите земји членки на ЕУ и во земјите кандидати за членство во Европската Унија. Таа повикува на силна грижа за менаџирање на квалитетот на животот на лицата со дијабетес, односно да се внимава да не развиваат компликации од болеста.

Дијабетичарите стравуваат дека доколку апаратите за мерење на шеќерот не се набавени во оригиналната кутија, тоа може да доведе до тоа тие да покажуваат неточни резултати што е опасно по нивниот живот. МАЛМЕД сепак, уверува дека увозот е законски и станува збор за оригинални апарати.