Покрај нови лични карти, пасоши и возачки дозволи граѓаните треба имаат и  налепници на регистерските таблички за возилата со ознаката „НМК“.

Налепниците, кои се бесплатни за граѓаните, од понеделникот можат да се подигнат во станиците за технички преглед, но сепак поради недоволната дистрибуција на налепници од страна на МВР, техничките прегледи брзо ги делат и голем број на граѓани остануваат без нив. На социјалните мрежи се нудат налепници идентични со оние од МВР, но за разлика од нив овде се продаваат за 50 денари. Револтираните граѓани велат дека доколку купат налепници ќе ја избегнат „комплицираната“ процедура на техничките прегледи. Освен на социјалните мрежи, налепници се продаваат и во продавници за автоделови ширум државата.

За да се добијат бесплатни налепници граѓаните треба со автомобилот и сообраќајната да дојдат во станиците за технички преглед и најпрво да пополнат барање на шалтерите на МВР. Потоа налепницата под видеонадзор и од страна на вработените ќе им биде залепена на регистарската таблица.

Сето ова може да се „избегне“ доколку се решите да се обратите до некоја од интернет продавниците на социјалните мрежи каде може да се забележат објави на кои се продаваат налепници „НМК“ во секаква димензија.

Цената за истите е 50 денари, а дополнително се плаќа доставата, во зависност до која локација е нарачката. Поради евтината цена голем број на граѓани се одлучуваат да нарачаат се со цел да ги избегнат нервозите кои ја сервира „сложената“ процедура на МВР.

Има и такви кои негодуваат на „незаконитото“ продавање на налепници, а има и од оние кои саркастично прашуваат дали можат да се набават пасоши, лични карти, возачки дозволи и сообраќајни книшки со кратенката „НМК“.

Од вчера на граничните премини возилата се пропуштаат според одредбата од Договорот од Преспа, со која престанаа да важат патните исправи и документи за меѓународна употреба, што го содржат името на државата Република Македонија.

Во понеделникот пак, на седница на Собранието, по предлог на сите политички партии, едногласно беше изгласано возачките дозволи со старото име да важат до крајот на годината, заклучно 31-ви декември.

Ваквата одлука веднаш беше потпишана од претседателот Стево Пендаровски и ја поздрави одлуката на пратениците кои ги ставиле интересите на граѓаните над дневната политика и донесоа решение за возачките дозволи. Според првичното решение, возачките дозволи со ознаката „Република Македонија“, од вчера веќе немаше да важат, не само за надворешна употреба, туку и во државава.

Со одлука на Владата од денес замената на возачките и сообраќајните дозволи поради промената на уставното име се врши бесплатно, а без надомест ќе бидат издавани и патните листови на нашите државјани кои се надвор од државава, а треба да се вратат поради промена на личните документи.