Ана Брнабиќ „си го дала срцето“ и ќе извршува „значајни функции“, но тешко дека ќе остане премиерка, најави српскиот претседател Александар Вучиќ.

Во обраќањето до граѓаните од Претседателството на Србија, Вучиќ рече дека уште пред изборите ѝ рекол на премиерката дека ова е нејзиниот последен мандат.

– Ана израсна во голем борец. Горд сум на неа. Тешко дека таа повторно ќе биде премиерка. Тоа ѝ го кажав пред изборите, но таа го даде срцето и се бореше во текот на целата кампања. Зад неа остануваат резултатите – рече Вучиќ.

Тој ги замили опозициските политичари да го прекинат штрајкот со глад, што го почнаа како протест против „изборните измами“ и со барање да бидат поништени изборите за градски власти во Белград.

– Сакам да ги замолам сите што штрајкуваат со глад да не го прават тоа. Нека се вратат убаво на обврските. Тие можат да организираат протести секој ден. Навикнат сум на протести – изјави Вучиќ.

Тој ја спореди актуелната ситуација со онаа во 2011 година, кога со глад штрајкуваше тогашниот лидер на Српската напредна партија Томислав Николиќ.

– Во 2011 година Томислав Николиќ не постигна ништо со штрајкување, освен што си го загрози здравјето – изјави Вучиќ.

Николиќ во април почна штрајк со глад, со барање за предвремени избори. Неговата здравствена состојба се влоши и со зголемен крвен притисок беше префрлен во болница, каде што одби инфузија. Дури кога сфати дека штрајкот нема да успее, тој се повлече, но веќе во 2012 година ги водеше напредњаците до победа на парламентарните избори, а тој беше избран за претседател на Србија.