ВТОРНИК, општествено одговорен угостителски објект во срцето на Струмица
СЛОБОДЕН ПЕЧАТ СЕ ЧИТА ВО ВТОРНИК!
Неодамна на нашиот официјален инстаграм-профил @slobodenpecat, сосема спонтано и автентично – на ваше барање, а на наше задоволство – започнавме иницијатива за поголема видливост на традиционалните медиуми преку понуда за читање весници во македонските угостителски објекти.
Препорачано
Еден од угостителски објекти кои се приклучија на иницијативата е струмичкиот бар „Вторник“, а во продолжение ќе дознаете повеќе за ова уникатно место во срцето на струмичката чаршија, кое важи за едно од омилените на локалците, но и посетителите во градот.
„Вторник“ – крафт бар со карактер!
„Вторник“ се наоѓа во срцето на Струмица и има фантастична тераса со поглед на чаршијата. Пред самиот објект ќе забележите еден фантастичен изум – комбе конвентирано во тераса, во буквална смисла на зборот. Ние го посетивме „Вторник“ во зимските денови, но веднаш си замисливме како би изгледало кога ќе раззелени. Значи, оваа посета ветува уште на почетокот.
Веднаш штом влеговме во „Вторник“, сфативме дека ние сме пристигнале во бар со карактер. Неизбежно е прво да се забележи постерот со слоганот „Дојди сам, биди со сите“, кој веднаш ни остави впечаток дека тука секој може да си помине добро, и совршено со вклопува со една од целите на нашата иницијатива – што повеќе луѓе да се охрабрат и да излегуваат сами.
Авторот на слоганот е досетливиот соптвеник Коста, кој вложил многу труд за целиот амбиент да биде уникатен и автентичен. Така, ѕидовите се исполнети со „македонско благо“: фотографија од незаменливата струмичка легенда Гоце Арнаудов, Ристо Шишков, локални уметнички дела и најважно од се, шанк со бар полн со македонски пијалоци, како и македонско крафт пиво.
Не можеше, а да не падне муабет за името :), па Коста накратко ни откри дека инспирацијата за „Вторник“ доаѓа од еден од најзначајните обичаи и традиции во Македонија – Струмичкиот карневал! Секоја година, почетокот на Струмичкиот карневал се одржува во текот на тримерските денови, односно во вторник навечер, два дена после празникот Прочка, започнува традиционалната карневалска вечер. Но, повеќе на темава ќе ни открие наскоро.
Коста вели дека „Вторник“ е отворен за соработка со сите кои вредно работат за да создадат квалитетен македонски производ, а тоа го потврдува понудата во барот. „Вторник“ активно промовира домашни артисти преку музика, поезија, филм и која било друга форма на уметност. Така, кога ние бевме во посета, барот се подготвуваше да биде домаќин на локален клуб на читатели.
Според сопственикот на „Вторник“, се што треба да побарате кога ќе стигнете таму е насмевка и чаша вода за старт. Ние, не така скромно ќе кажеме дека се воодушевивме од локална кавадерчка семејна ракија која е генерациски производ, но и од фантастичната селекција на македонските крафт пива. Дефинитивно си заминавме насмеани со желба да се вратиме што поскоро во „Вторник“!
Целта на „Вторник“ е следна, а ќе ја пренесеме баш како што ни ја кажа сопственикот Коста, за да остане автентична на симпатичниот струмички дијалект:
„Целта ни е да ја подигнеме свеста кај љуѓето за конечно да почнат да го ценат своето, да не бегат од својот генетски код и да го почитуваат македонскиот производ… И разбира се, „Да живее чаршијата засекогаш!“
ЛОКАЦИЈА: Струмица, Маршал Тито 21
РАБОТНО ВРЕМЕ: понеделник до сабота од 16:00 – 00:00, недела од 18:00 – 00:00
СЕ ЧИТАМЕ ВО ВТОРНИК!
