Легендарните аркадни видеоигри, со кои пораснаа повеќе генерации, сега имаат и помпезни мермерни куќишта што одговараат на нивната важност. Колекцијата се вика „Аркадија“, а ја потпишува францускиот уметник Харолд Сангуард, кој го користи прекарот Хароу, пишува „Пун куфер“.

Видеоигрите што го променија значењето на забавата, како што се „Супер Марио“ и „Дум“, сега можат да имаат централно место и во домовите на нивните обожаватели. Мермерните куќишта со познатите аркадни игри се изработуваат по нарачка и рачно.

Тежат околу 300 килограми и се високи преку два метра, а ширината им варира од модел до модел, но во помал стан ќе ви биде тешко да ги соберете. Изработката трае една година, а за куќиштето ќе треба да платите нешто помалку од 93 илјади евра.

Покрај рачното производство, односно резба во класичен ренесансен стил, цената е „оправдана“ и поради внимателно одбраниот материјал – мермер „Калката“. Се разбира, секое мермерно куќиште е опремено со Ел-си-ди екран со висока резолуција, џојстик и контроли.