Новиот уредник на „Венити Фер“ (Vanity Fair) Марк Гвидучи, наводно сака првата дама на Соединетите Американски Држави, Меланија Трамп, да биде на насловната страница на списанието, што предизвика негодување кај некои вработени, објавува „Њујорк Пост“. Уредниците наводно рекле дека ќе поднесат оставка ако тоа се случи.

„Ќе излезам низ таа проклета врата, а половина од мојот персонал ќе ме следи“, изјавил еден уредник за „Дејли Мејл“, кој побарал да остане анонимен.

Други вработени ги отфрлаат тврдењата за масовен егзодус, нагласувајќи дека одлуката е на Гвидучи и дека повеќето нема да дадат отказ поради една сторија и насловната страница.

Меланија Трамп претходно изјави дека нема интерес да се појавува на насловните страници на престижни списанија, нагласувајќи дека постојат поважни приоритети од вниманието на медиумите.

„Видете, јас сум била на насловната страница на списанија – на насловната страница на „Вог“ на насловната страница на многу списанија претходно … Имаме толку многу други поважни работи да правиме отколку да бидеме на насловната страница на кое било списание. Не мислам дека животот на никого ќе се промени ако е на насловна страница“, изјави Меланија за „Фокс Њуз“.