Федералниот суд пресуди дека социјалната мрежа Икс, порано позната како Твитер, мора да се соочи со тужба откако вработените ја обвинија компанијата дека не ги исплатила бонусите што им биле ветени. Судијата во петокот го одби барањето за отфрлање на случајот.

Според тужбата поднесена во јуни оваа година, Икс се соочува со тужба дека не платил годишни бонуси на персоналот, откако милијардерот Илон Маск ја купи компанијата во октомври 2022 година, и покрај постојаните уверувања од извршните директори пред и по договорот дека компанијата ќе ги исплати ветените бонуси.

Тужбата била поднесена до федералниот суд во Сан Франциско од Марк Шобингер, кој бил виш директор за компензација во компанијата до мај, кога ја напуштил компанијата. Федералниот суд кон крајот на минатата недела објави дека случајот на Шобингер против Икс е веродостоен и дозволи да продолжи.

„Понудата на Твитер да им исплати бонуси за возврат стана обврзувачки договор според законот во Калифорнија“, рече американскиот окружен судија Винс Чабриа во пресудата.

Компанијата тврди дека усното ветување не треба да биде обврзувачко и дека случајот треба да биде сослушан во Тексас. Но, судијата рече дека законот во Калифорнија се применува за овие прашања.

Во јунската жалба се вели дека откако беше објавено дека Маск ја купува компанијата минатиот април, „многу вработени изразија загриженост“ за судбината на „нивниот надомест и годишниот бонус“.

Во месеците пред Маск да го заврши купувањето на Твитер, директорите на компанијата постојано им ветуваа на вработените дека бонусите за 2022 година ќе бидат исплатени со 50% од целта, се вели во тужбата, додавајќи дека „ветувањето се повтори по купувањето на Маск“.

Сепак, и покрај ветувањата, Икс не успеа да ги плати бонусите, се вели во тужбата. Шобингер ја напуштил компанијата во мај, откако „Твитер одби да ги исполни различните ветувања што им ги даде на вработените , вклучително и неисплата на ветените бонуси“, се вели во тужбата.