Двајца контролори од Фондот за здравствено осигурување заработија обвинение кое денеска им е поднесено од скопското јавно обвинителство кое ги обвини дека сториле кривично дело примање поткуп.

Во обвинителниот акт пишува дека вчера во ресторан на булеварот „Филип Втори Македонски“ во Скопје, двајцата осомничени како службени лица подрачната единица на Фондот за здравствено осигурување во  Скопје, директно побарале имотна корист за себе и за друг за да извршат службено дејствие што не би смееле да го извршат. Тие од еден оштетен побарале 30.000 денари за да не изречат парична или друга санкција за приватна здравствена установа во која сопственик и управител бил оштетениот.

„Контролата во приватната здравствена установа била извршена од 16 до 19 овој месец. Потоа бил изготвен записник во кој биле констатирани неправилности при изготвување на образец за привремена спреченост за работа на пациент на кој оштетениот му бил матичен лекар. По изготвувањето на записникот, една од осомничените понудила да не биде изречена санкција за контролираното правно лице, а за возврат побарала парична награда – поткуп во износ од 30.000 денари.

Од тој износ по 10.000 денари биле наменети за двајцата осомничени и за уште едно засега непознато лице, исто така контролор во Фондот за здравствено осигурување. Второто осомничено лице неколкупати телефонски го контактирало оштетениот, повторувајќи му дека треба да ја даде паричната награда за да нема последици за неговата ординација. Во еден од телефонските разговори тој го договорил времето и местото на средбата во ресторанот за да се изврши примопредавање на побараните парични средства“ се вели во обвини.

Бидејќи постојат околности кои укажуваат дека мерката притвор е неопходна за да се обезбеди присуството на осомничените во текот на кривичната постапка, надлежниот јавен обвинител денеска од судија на претходна постапка побара на двајцата да им се одреди и притвор.