Откако почина 27-годишна жена од штипското село Кучица по убод од крлеж, едно медицинско лице од Клиниката за инфективни болести и фебрилни состојби во Скопје каде се лекуваше жената, е исто така позитивно на конго-кримска хеморагична треска, потврдуваат за „Слободен печат“ од Министерството за здравство. Смртноста од конго-кримска хеморагична треска е 40 проценти.

Вработениот од Клиниката бил идентификуван како контакт со среден ризик и на деветтиот ден од надзорот пројавил симптоми и согласно добиените резултати од одделот на Институтот за јавно здравје е позитивен случај на Конго-кримска хеморагична треска. Пациентот е хоспитализиран на Клиниката за инфективни болести и фебрилни состојби во Скопје, а епидемиолошкиот оддел на Центарот за јавно здравје Скопје веднаш формирал екипа за теренски увид која ги спровела потребните активности, односно извршени се анкетирања на вработениот, ставање под надзор на контактите од здравствен ризик со цел спречување од понатамошно ширење на болеста.

Здравствениот надзор трае 14 дена од последниот контакт со пациентот. Контактите од првиот позитивен случај, односно од 27-годишната сега покојна жена, се под надзор до 10 август.

Должината на периодот од заразување до појава на симптоми зависи од начинот на стекнување на вирусот. По инфекцијата со каснување од крлеж, периодот е обично еден до три дена, со максимум од девет дена. Периодот по контакт со заразена крв или ткива е обично пет до шест дена, со документирани максимум 14 дена.

Почетокот на болеста е ненадеен, со главоболка, висока температура, болки во грбот, болки во зглобовите, болки во стомакот и повраќање. Црвени очи, зацрвенето лице, црвено грло, и црвени дамки на непцето, се исто така присутни. Може да се јави жолтица, а во потешки случаи, промени во расположението. Како што напредува болеста, на телото на заболениот се јавуваат големи делови со модрици, како и крварење од носот. Закрепнувањето е бавно.

Стручен тим од Одделот за епидемиологија на заразни болести при Институтот за јавно здравје на Република Северна Македонија во соработка со надлежни епидемиолози од Центрите за јавно здравје на Штип и Скопје, направија теренско истражување во Клиничка болница Штип, Итна медицинска помош Штип и во семејството на сега почината жена. Стручен тим епидемиолози направија теренски увид и на КИБФС во Скопје. На сите овие локации, епидемиолозите направија пребарување на контактите нивно соодветно класифицирање на лица со висок ризик, лица со среден ризик и лица со низок ризик и лица без ризик. На сите идентификувани контакти проценети со ризик, им без издадени Решенија од Државниот здравствен и санитарен инспекторат и ставени се под 14-дневен здравствен надзор, спроведуван од надлежен Центар за јавно здравје.

Како што веќе објави „Слободен печат“ крлежот што ѝ пренесе конго-кримска хеморагична треска на 27-годишната жена од штипското село Кучица по што таа почина, на нејзиното тело задржан бил само еден час, што укажува на потентноста на вирусот и неговата сериозност. Од моментот на првите тегоби до смртниот исход на младата жена, поминале шест дена, но симптомите кај неа биле неспецифични, како температура, болки во мускулите и повраќање.

Почина 27-годишна штипјанка од конго-кримска хеморагична треска, ја каснал крлеж