Возовите во Македонија никако да го испочитуваат возниот ред. Гневните граѓани кои редовно патуваат со возовите се жалат до Македонски железници транспорт бидејќи скоро секој ден возовите каснат најмалку половина до еден час, па дури и по неколку часа, поради што не можат навреме да стигнат ниту на работа, ниту на  лекар.

Последен пример е возот кој попладнето во 16:55 часот тргна од Гевгелија кој во Велес стигна со задоцнување од 2 часа. Како што информираа од Железничката станица во Велес причината за доцнењето било проширување на шините на железничката пруга како последица од  високите температури на железничката станица Клисура.

Поради доцнењето на возот голем број на патници на станиците во Градско и  Велес револтирани реагираа  до МЖ транспорт поради  долгото  чекање на возот.

Тие информираат за МИА  дека  неделава овој воз Гевгелија –Скопје   скоро секој ден доцни по 60-тина минути.

И не само тој од Гевгелија, вечерва во Велес 60 минути каснеше и попладневниот воз кој од Битола оди за Скопје преку Велес, кој од станицата во Битола поаѓа во 18:24 часот. Во Велес наместо во 21 часот пристигна во 22 часот.

Железничкиот сообраќај стана секојдневно мачење, се жалат граѓаните.