Шокантна приказна за тоа како актерот Џон Хам физички го злоставувал бруцошот Марк Сандерс за време на иницијација во братство повторно излезе на површина, а поддржувачите на културата на отповикување сѐ погласно бараат одговорност од ѕвездата, пишува „Дејли мејл“.

Инаку, глумецот во моментов ужива во нов бран на популарност по гостувањето во шоуто „Сатурдај најт лајв“ и успехот на новата серија „Твоите пријатели и соседи“ (Your Friends & Neighbors).

Хам бил еден од седумтемина членови на братството „Сигма Ну“ кои во 1990 година го злоставувале бруцошот Марк Сандерс на Универзитетот на Тексас во Остин. За време на бруталната иницијација, Сандерс добил фрактура на рбетниот столб и речиси го изгубил бубрегот.

Досега, Хам само еднаш се огласил по објавувањето на приказната во 2015 година, опишувајќи ја ситуацијата како „непријатна работа“ и „сензационализирана приказна“.

„Не би рекол дека тоа е точно. Сѐ во врска со тоа е претерано. Ме обвинија за нешто што… Тешко ми е да зборувам за тоа, не сакам да му давам повеќе простор. Тоа беше непријатна работа што се случи“, изјави Хам.

Во првата епизода од својот нов поткаст, колумнистката на „Дејли мејл“ Морин Калахен повторно го отвори случајот и го повика Хам да се соочи со последиците. Таа исто така го критикуваше неговиот „ограничен актерски опсег“ и холивудските ласкачи кои, според неа, премногу паѓаат на неговиот изглед за да го повикаат на одговорност.

Калахен детално го опиша злоставувањето кое, наводно, Хам и останатите му го нанеле на Сандерс, вклучувајќи и ќотекот што го добил бидејќи не го нарекол Хам со прекарот Ем-си Хамер.

„Ги води двајцата бруцоши на горниот кат, каде што ги чекале уште двајца со дрвени палки. Тоа не биле рекети за пинг-понг. Тоа биле вистински, дрвени палки, долги најмалку триесетина сантиметри. Почнуваат да го тепаат Марк Сандерс. Тој вели дека било силно, од сѐ сила. Го удирале од двете страни.“

Според транскриптот, Џон Хам зел палка и го удрил Сандерс во десниот бубрег.

„Ме удри точно преку десниот бубрег. Силен, прецизен удар. И тоа буквално ме крена на нозе“, сведочел Сандерс, додавајќи дека му го кинеле долното бельо од панталоните.

„Начинот на кој влечеа… еден влечеше нагоре, друг надолу, како да сечат. Болеше, многу болеше“, рече тој.

Калахен тврди дека Хам во тоа време бил „официјален член“ на братството и дека Сандерс рекол дека бил со него цела ноќ, па и во моментот кога бил принуден да влезе во валкан, тесен простор и да прави склекови и покрај тешко повредениот бубрег.

Понатаму, според неа, Хам со запалка запалил дел од фармерките на Сандерс каде што се држи ременот, и тоа веднаш пламнало.

„Се обидов веднаш да го изгаснам огнот, но ми ја турна раката. Бев во паника затоа што носев памучна маичка,“ стои во транскриптот.

„Го чувствував пламенот. Се обидував со раце, но Џон Хам не ми дозволи. Ми рече да го изгаснам со уста“, сведочел Сандерс.

Понатаму, Сандерс изјавил дека Хам зел чекан, го ставил под неговите гениталии и го влечел по собата цела минута. По ова, Сандерс го напуштил универзитетот и побарал психолошка помош. Била покрената полициска истрага, а локалното братство било распуштено.

Хам, како студент од втора година, бил идентификуван како еден од главните сторители и бил уапсен во 1993 година. Обвинението за напад подоцна било отфрлено, а тој добил условна казна, избегнувајќи судска осуда за злоставување.

Калахен не застана тука и се нафрли и на познатите пријатели на Хам.

„Во новиот број на списанието ‘Интервју’, го интервјуира Тина Феј, неговата добра пријателка. Буквално си ласкаат еден на друг. И секогаш сум се прашувала за луѓе како неа и Кристен Виг, комичарки кои му ги отворија вратите на Хам во тимот на ‘Стардеј најт лајв’. Моја теорија е дека тие никогаш не биле кралици на матурските забави. Биле штреберки, малку аутсајдерки. И тогаш се појавува некој како Џон Хам, им посветува малку внимание и тие паѓаат на тоа. Не можат да поверуваат дека таков тип ги забележува. И сега, мислам, му прават услуги“, вели таа.

Таа потоа зборуваше и за неговата кариера, но и за тоа како ја оставил долгогодишната девојка, актерката Џенифер Вестфелт.

„Заврши со некоја споредна актерка, буквално статистка. Некој чиј талент никогаш нема да го надмине неговиот. Двапати помлада од него“, рече таа за неговата сегашна сопруга Ана Осцеола.

„Се ожени со неа, па во интервјуа зборува како сега можеби би сакал деца. Сигурна сум дека Џенифер Вестфелт е воодушевена што ги жртвувала своите соништа за тој гад“, заклучи Калахен.