Министерството за финансии го одбило барањето за даночни олеснувања за 100 процентната исплата на дневниците за професионалните возачи, кои имаат сопствен превоз и сместување во возилото, живеат во простор од 2 х 2 м и се борат да ги завршат своите работни активности. Од Асоцијацијата „Макам Транс“ за „Слободен печат“ велат дека негативното мислење е со објаснување дека би „имало финансиски импликации за буџетот на државата и би било дискриминација во однос на сите други кои се корисници на ова даночно олеснување“.

Билјана Муратовска, генерална секретарка на „Макам Транс“, оценува дека воопшто не станува збор за некаква дискриминација кон другите дејности, бидејќи минималните остапки се однесуваат на 1,5 отсто од вкупно вработените професионални возачи, а со нивното неприфаќање се нанесува штета на битна дејност од стопанството.

-Баравме да се донесе измена на Уредбата за издатоците за службени патувања и селидби во странство, кои на органите на државната управа им се признаваат како тековни трошоци кои индиректно преку одредби наведени во Општиот колективен договор за стопанството и Законот за данок на личен доход се однесува за сите правни субјекти во државата (член 12 став (1) точка 18) и е основ за даночно олеснување по примерот на многу држави во ЕУ. Србија на пример од оваа година согласно закон одреди дневница за службен пат од 90 евра, како олеснителна мерка за раст и развој на оваа дејност – објаснува Билјана Муратовска, генерална секретарка на „Макам Транс“.

Возачите, додава Муратовска, согласно своите работни активности постојано се на пат, а сите останати вклучуваќи ја и државната администрација одат повремено на службен пат и се работи за индиректни трошоци во рамките на структурата на трошоците на работењето.

-Каква иронија, директните трошоци на превозните друштва во вид на дневници се третираат како личен трошок на возачите, кој ако се исплати во поголем износ треба да се оданочи со персонален данок, а администрацијата и кога се е обезбедено и платено од организаторот на настанот може да добие дополнително 50 отсто од дневницата согласно измените на Уредбата од март 2025 година – посочува Муратовска.

Генерална секретарка на „Макам Транс“ додава дека во даночните закони стои дека мора да се води сметка за економската суштина на секоја дејност. Според неа потребна е сериозна анализа за тоа колку превозните трговски друштва придонесуваат во полнење на буџетот на државата и тоа со: акцизи и ДДВ од горивото (од 500 до 1.000 литри по резервоар), патарини, надомест за патишта при регистрација на возниот парк и дополнителни комунални такси по одредени општини, персонален данок за вработените лица, ДДВ за купени возила, ДДВ за превози кои се извршуваат исклучиво на територија на ЕУ или други држави од Европа при што матичната држава не се транзитира, а најбитно од се е приливот на ефективни странски пари.

-Превозните трговски друштва се големи инвеститори кои обезбедуваат сопствени средства, но затоа што инвестицијата е на тркала никој не ја гледа, нити ја почитува онака како што се прави за изградба на фабрика или некој погон, односно влог на странски инвеститор. Исплатената дневница на професионалниот возач, споредено со комерцијалист или некој вработен од администрацијата е различен трошок кој треба и тоа как да се раздвои и одели од другите професии – оценува Муратовска.

Ако останеме без возачи, дуќаните ќе бидат празни

Податоците покажуваат дека превозните трговски друштва кои превезуваат 96 отсто од стоките во увоз и извоз се борат за опстанок на територијата на цела Европа, се соочуваат со огромна конкуренција која во услови на економска и воена криза го зема својот данок, но тие работат затоа што возилата неможат да стојат, а нашите продавници ќе бидат полупразни или полни со енормно скапи производи затоа што превозот ќе го вршат странски превозници.

Во превозот нафтата и дневниците на возачите се директни трошоци и влијаат на цената на превозот, но во исто време се и основни елементи за да се задржат возачите кои во последните 10 години систематски се привлекуваат од страна на европските држави, со спроведување на нестандардни мерки кои значат долги чекања за влез во ЕУ, контроли и изрекување на казни и за прекршоци кои не постојат.

-Броењето на денови за престој, кој не е престој во Шенген зоната затоа што се работи за вршење на работни задачи за македонски друштва, барањето на посебни евиденции и електронското пријавување на возачите и превозите во и од државите членки на ЕУ и другите сопки, се причината за се поголемиот одлив и немање на мотив за професијата возач да се извршува за македонски превозни друштва – поентира Муратовска.