Двегодишно момче од Белград вчера било прегазено од возач на градски автобус, по што десетина жители на населбата излегле и со палки го демолирале автобусот, јавуваат српските медиуми.

Момчето В.П. има потрес на мозокот и тешки повреди на главата откако истрчало пред куќата и било удрено од автобусот, кој наишол со голема брзина. Детето е пуштено на домашно лекување.

Веднаш по несреќата, се собрале жители на околните куќи и почнале да го кршат автобусот, а 48-годишниот возач на линијата 602 избегал.

Таткото на момчето вели дека е среќен што неговиот син е пуштен од болница и дека лекарите му рекле дека малиот целосно ќе закрепне, без оглед на сериозноста на повредите.

– Фала му на Бога што беше пуштен дома. Тоа ми дава надеж дека целосно ќе закрепне. Веќе два дена сум полуден. Не знам што да ви кажам. Како родител, најважно за мене е да нема последици за детето – рече таткото Александар.

Очевидци на несреќата раскажуваат дека таа се случила за само неколку секунди. Малото момче излегло од дворот на куќата токму во моментот кога поминувал автобусот.

– Сè се случи за неколку секунди. Одеше толку брзо што, мислам, дури и не виде дека го удри детето бидејќи застана само по околу дваесет метри. Детето буквално одлета од ударот. Лежеше целото крваво, неподвижно – рече сосед кој бил сведок на драмата што се случи во приградската населба Сурчин.