Генералниот секретар на НАТО Јенс Столтенберг ги повика членките на Алијансата да се подготват за конфронтација со Русија што може да трае со децении и да го зајакнат својот воен потенцијал, пишува весникот „Велт“.

– НАТО не се стреми кон војна со Русија. Сепак, треба да се вооружиме за можна конфронтација која би можела да трае со децении – изјави Столтенберг.

Тој повика на зголемени и побрзи нарачки за европските одбранбени компании. Според Столтенберг, во услови на пазарна економија, на производителите на оружје им требаат потпишани договори за да можат да го зголемат производството.

– Неопходно е побрзо да се обнови и прошири нашата индустриска база за да можеме да ги зголемиме испораките во Украина и да ги надополниме нашите залихи, нагласи генералниот секретар на Алијансата.

Како што заклучи, најдобра заштита во овој момент е поддршката на Украина и инвестирањето во воениот потенцијал на НАТО.

Москва постојано предупредува дека НАТО е фокусиран на конфронтација. Русија рече дека останува отворена за дијалог со Алијансата, но на рамноправна основа и дека Западот треба да се откаже од политиката на милитаризација на Европа.