ЈП „Водовод и канализација“ и Општина Сопиште во периодот од 21 до 23 јули, спровеле акција за откривање на диви, нелегални приклучоци и злоупотреба на вода на територија на општината. Акцијата ја спровеле контролори на јавното претпријатие, придружувани од комунални редари од Општината, во населените места Сопиште, Добри Дол и Ракотинци, каде не биле детектирани диви  приклучоци.

Во текот на акцијата беше апелирано до населението и укажано да се придржуваат до советите за рационално користење и употреба на водата. Да се избегнува полевање на поголеми површини и непотребно трошење на водата за полнење на базени, полевање градинарски култури и слично – соопштија од „Водовод и канализација“.

Од претпријатието соопштуваат дека ќе продолжат  континуирано да работат во насока на одржување на водоснабдителниот и канализацискиот систем, негова заштита од злоупотреба како и заштита на водата за пиење од злоупотреба и нерационално користење.