Јавното претпријатие „Водовод и канализација – Скопје“ повторно упати апел до граѓаните за рационално и совесно користење на водата за пиење, поради енормно зголемената и неконтролирана дневна потрошувачка, која, како што велат, сериозно го нарушува стабилното водоснабдување во градот.

Од претпријатието потсетуваат дека Скопје се снабдува со вода од природен извор со ограничени количини, и повикуваат да се избегнува непотребно трошење – особено за полевање бавчи, перење возила, полнење базени и слични активности. Како последица на претераната потрошувачка, во некои делови од градот има намален притисок и повремени прекини во снабдувањето со вода.

ЈП „Водовод и канализација“ апелира и до локалната самоуправа и месните заедници активно да се вклучат во подигнување на јавната свест за рационално користење на водата.

Граѓаните кои ќе забележат див приклучок можат да пријават на 02/3073-010, на контакт е-поштата [email protected] или преку веб-страницата www.vodovod-skopje.com.mk.

„Со дивите приклучоци се нанесува директна штета на водоснабдувачкиот систем и на квалитетот на водата за сите корисници“, велат од претпријатието.