Гол популизам, партиски маркетинг и дефокус од реалните проблеми на граѓаните, е впечатокот од двомесечниот коалициски брак на новата Влада. Или метафорично кажано, владините партнери ВМРО-ДПМНЕ, Вреди и Движењето ЗНАМ во Влада си гугукаат, а во јавност се плукаат во интерес на партиските рејтинзи. Граѓаните секојдневно сведочат на меѓусебна коалициска размена на арсенал навреди, укажувања, исцртување црвени линии, укорувања од типот кому каде му е местото и што треба да работи, а паднаа и првите кривични пријави меѓу владините партнери за говор на омраза.

И додека досега препукувањата беа резервирани за Вреди и за ЗНАМ, во владиното „хармонично“ кохабитирање се приклучи и најголемиот носител на власта, коалицијата на ВМРО-ДПМНЕ, предводена од премиерот Христијан Мицкоски, која ги размени првите отровни стрели со Вреди.

– Поднесовме кривична пријава против лицето Петар Богојески за говор на омраза на социјалната мрежа Фејсбук. Тој со говорот на омраза стори кривично дело, казниво по член 319 и 394 од Кривичниот законик. Го поттикнуваме јавното обвинителство во иднина овие кривични дела да ги гони по службена должност, по допрен глас зашто тие се јавни и се емитуваат на медиумите, на социјалните мрежи и на дневните вести – рече Абидин Абдуљи, правен застапник на Вреди.

Абази: Не е време за кревање рејтинзи

Бујаре Абази, потпретседателка на Алијанса на Арбен Таравари, изјави дека не е време за кревање рејтинзи во таква форма и дека тоа е во прилог на опозициската ДУИ, која планира дестабилизација. Таа смета дека треба да се фокусираат на стандардот на граѓаните, на здравството и на образованието. Според Абази, политичарите мора да сфатат дека носат одговорност и дека таквите изјави никој не треба да ги поддржува. Таа очекува правна разврска за говорот на омраза на Богојески, но не смета дека тоа ќе влијае врз владината коалиција.

– Не треба да се мешаат двете работи во смисла на планирање и на реализирање на програмите што сме им ги ветиле на граѓаните. Но, мора да покажеме дека такво нешто е недозволиво, и тоа не само за Вреди, туку и за сите други што не се Македонци. Таков начин на непочитување на другиот, апсолутно сметам дека не ни носи добро, ниту овозможува ние да развиеме добри односи меѓу двата најголеми етникуми. Мислам дека политички нема да влијае, но мора да се покажат границите што е дозволено, а што не е. Нема да молчиме во ситуации кога не нè третираат со почит – рече Абази.

Богојески од Македонски концепт, партија што е дел од коалицијата, предводена од ВМРО-ДПМНЕ, од пред Обвинителството изјави дека отвориле предмет за процесирање на „стотици сторители од албанското злосторничко, шовинистичко здружување и дека само вчера до МВР поднеле повеќе од 15 пријави за закани по живот и навреди кон Македонија и македонскиот народ“.

– Во Македонија, противправно и спротивно на насоките на ЕУ и Венецијанската комисија, се користи албанскиот јазик и спротивно на Устав и Закон се користи знамето на Албанија. Секојдневно македонски државјани, а албански етнички шовинисти, се користат со навреди и омаловажување на Македонија и македонскиот народ, што е казниво по Кривичниот законик, а никој не постапува по закон. Албански шовинисти не плаќаат данок, а користат државни плата, субвенции, социјална помош, се прикриваат воени злосторства против човештвото, спроведена е нелегална амнестија и не се почитуваат барањата на Советот на Европа за постапување пред Меѓународниот кривичен суд во Хаг. Се злоупотребуваат работни места по институции, особено во МВР, каде што се прикриваат престапите на албанските шовинисти.
Се врши насилство врз млади деца и стари лица од албански бандити низ центарот на Скопје, се живее под закани и уцени, се живее под терористичко поведение на организирани групи. Се создава атмосфера на линч против секој што не им се плаши на албанските шовинисти, како ние од Македонски концепт. Секој ден, албански шовинисти шират етничка и верска омраза, а по тие предмети не постапува ОЈО или МВР, под притисок на политички субјекти, новинари и граѓани, организирани во злосторничко шовинистичко здружување – рече Богојески.

 

Тој, пак, кривичната од Вреди ја доби за фејсбук-статус во кој Албанците ги именува со „Шиптари“.

Муртезани го критикува Тошковски

И додека Вреди во изминативе два месеца се воздржуваше да ја критикува ВМРО-ДПМНЕ, иако се на спротивни позиции за балансерот, за кој забелешки упатуваа само кон ЗНАМ, свадбарската свита со службени возила во Косово, предводена од претседателот на Собранието Африм Гаши, беше тригер министерот за евроинтеграции Орхан Муртезани да го критикува министерот за внатрешни Панче Тошковски. Тој во гостување на ТВ 21 му порача на Тошковски да не се занимава со Гаши, туку со убиствата што секојдневно се случуваат во Скопје.

– Јас го разбирам и министерот за внатрешни работи, кој веројатно сака да порача дека никој не е над законот, но ние во Скопје секојдневно имаме убиства и мислам дека главниот фокус на МВР треба да биде борба против секојдневниот криминал што ги загрозува животите на граѓаните – рече Муртезани.

Вреди претходно се конфронтираше со ЗНАМ, која се спротивстави на употребата на албанското знаме во министерствата со кои раководи Вреди, потоа – за балансерот, за скандалот со косовската претседателка Вјоса Османи, за заклетвата на Гаши која прво беше дадена на албански јазик. Но, и Муртезани како и Мицкоски, смета дека одлично функционира владината коалиција и дека на владините седници нема конфронтација.

– Движењето ЗНАМ само реагира пред камерите, бидејќи нема конфликт во власта. Ваквото однесување на ЗНАМ е да привлече медиумско внимание. Она што не се гледа во власта, се гледа во јавноста, бидејќи со ЗНАМ не се чувствува притисок во Владата, а нивниот претседател често се појавува во јавноста и дава често контрадикторни изјави. Ова го оценивме како обид да се покрие недостигот на медиумско внимание, со напади врз Албанците, бидејќи нема друга логика. Во разговорите во Владата и во институционалната комуникација во министерствата и институциите нема ниту искра на конфликт – вели Муртезани.

Претходно, пак, Таравари му порача на лидерот на ЗНАМ Максим Димитриевски, да внимава што зборува, оти идната година го чекаат локални избори и повторно ќе му требаат албански гласови. Димитриевски еден ден претходно му порача на Вреди да престане да го имитира ДУИ.

– Граѓаните веќе не се оптоварени кој какво знаме ќе вее и кој е поголем заложник за исполнување на некои си, наводни, национални платформи и стратегии, туку, едноставно, граѓаните сакаат да живеат во средена држава, во која корупцијата ќе се намали, ќе се изгради систем и ќе се направи функционална држава, функционален систем – рече Димитриевски.

Вреди и ЗНАМ не ја кријат нетрпеливоста. За да се дистанцира, ЗНАМ тврди дека договор за владино партнерство направиле со Мицкоски, а не со Вреди. Ова, пак, за Вреди е наивен популизам со краток здив, бидејќи мнозинството го сочинуваат две коалиции и едно движење.

Мицкоски неодамна изјави дека владината коалиција функционира беспрекорно.

– Амбиентот внатре е навистина конструктивен. Логично е и дома да сте, да имате различни ставови по некои прашања, но секогаш се наоѓа решение. Тоа што е важно е дека оваа влада има поддршка од повеќе од две третини од пратениците во Собранието, и тоа е она што мене ме прави горд и што ме инспирира како Влада да продолжиме да градиме за граѓаните. Инаку, опозицијата ќе се обидува да создава еден таков тип пораки во јавноста, но состојбата е многу конструктивна. Без исклучок, сите што се дел од владината коалиција, на дневна основа се трудат да направат нешто добро за државата и за граѓаните – рече Мицкоски.